DILI, STLTIMORLESTE.com – Pré-Eskolar Sagrada Familia Vila-Verde atualmente iha profesor ida ne’ebé kaer turma rua, tanba eskola fahe prosesu ensinu-aprendizajen ba turnu rua, dader no meudia.
Kordenador Pré-Eskolar Sagrada Familia Vila-Verde, Cornelio A. Soares hatete ba STL, Sesta-feira (09/10/2026), katak eskola iha sala aula hamutuk ne’en, ho fahe ba grupu A no grupu B.
“Iha nee ami nian sala de aula nee tolu. Iha grupu B nian sala hat, grupu A sala rua, hamutuk sala ne’en. Ami nian sala de aula nee sufisiente ona ba ami nian estudante sira. Konaba professor mos ami sufisiente hela, tanba professor ida kaer turma rua,” dehan Cornelio.
Nia esplika katak, professor sira hala’o turnu primeiru dader no turnu segundu meudia, ho oras servisu husi tuku 8 dadeer to’o tuku 10, no kontinua fali husi tuku 12 to’o tuku 1 no balun.
Tuir nia, sala ensinu-aprendizajen ne’ebé iha agora konsidera sufisiente atu simu estudante sira no hala’o atividade aprendizajen.
Nia hatete katak, professor sira kontinua hala’o knar tuir oráriu hanorin ne’ebé estabelese ona, liuliu tanba estudante pré-eskolár balun seidauk toman ho ambiente no rotina eskola.
“Estudantes iha pré-eskolár nee balun mai primeiru seidauk toman. Maibé professor sira uza maneira oinsa mak estudante sira bele toman lalais. Ami halo turnu rua deit, mak dader ho meudia,” nia esplika.
Cornelio hatutan katak, iha Pré-Eskolar Sagrada Familia Vila-Verde mos iha fatin biblioteka ida ne’ebé uza atu suporta prosesu aprendizajen estudante sira.
(jac)
