DILI, STLTIMORLESTE.com — Prezidente Repúblika (PR), José Ramos-Horta hasoru bolseiru Timoroan na’in 29 ne’ebé sei ba kontinua estudu iha Portugal.
Reitór IOB, Pedro Barreto Ximenes hatete ba jornalista iha Palásiu Prezidensiál Nicolau Lobato, Bairo Pité, Sesta (09/10/2026), katak enkontru ne’e atu estudante sira despede Prezidente Repúblika hanesan aman no avó.
“Hasoru Prezidente Repúblika hanesan aman, hanesan avó, atu despede no simu nia lia-menon ba estudante sira ne’ebé atu ba Portugal,” Reitór IOB hatete.
Estudante na’in 29 ne’e sei fahe ba instituisaun edukasaun rua. Estudante na’in 21 sei kontinua estudu iha Institutu Politékniku de Bragança, enkuantu na’in 8 sei tama eskola sekundária tékniku-vokasionál.
Reitór Pedro Barreto Ximenes esplika katak, programa bolsa estudu ne’e hahú iha 2017 no kontinua to’o agora, ho kooperasaun entre instituisaun sira no apoiu husi Governu Timor-Leste no Portugal, inklui partisipasaun família estudante sira.
“Programa ne’e ami hala’o kedas desde 2017 to’o agora. Total benefisiáriu besik 300 estudante, liuhusi kooperasaun entre instituisaun no apoiu husi Governu Timor-Leste no Portugal,” nia hatete.
Nia hatete katak, maioria estudante sira ba hetan formasaun tékniku-vokasionál, enkuantu 40% kontinua estudu iha ensinu superiór.
Durasaun estudu depende ba programa ne’ebé estudante ida-idak hili. Kursu tékniku-vokasionál balu dura tinan tolu, enkuantu programa ensinu sekundáriu no formasaun vokasionál seluk bele dura tinan rua to’o tinan haat.
Iha enkontru ne’e, Prezidente José Ramos-Horta fó mensajen ba estudante sira atu fó prioridade ba estudu no uza oportunidade ne’e ho responsabilidade.
Prezidente hatete Primeiru estuda, estuda no estuda. Saida de’it mak halo, tenke hanoin katak ba Portugal ho objetivu atu estuda.
Xefe Estadu mós hato’o apresiasaun ba inisiativa IOB nian ne’ebé fasilita oportunidade estudu ba estudante Timoroan. Nia subliña katak Portugal iha sistema edukasaun ho kualidade aas, ne’ebé bele fó benefísiu ba estudante sira.
Nia husu estudante sira atu la halo difikuldade iha lian Portugés sai obstákulu ba sira-nia estudu. Tuir Prezidente, estudante Timoroan ne’ebé estuda iha nasaun hanesan Xina, Vietname no Coreia mós bele aprende lian foun, nune’e estudante sira tenke iha vontade atu aprende Portugés.
Estudante Glória Patricia Freitas da Silva hato’o sentimentu orgullu tanba hetan oportunidade atu kontinua estudu iha Portugal.
Estudante seluk, Jonas Barreto Lopes, hatete katak mensajen husi Prezidente Repúblika fó motivasaun ba nia atu kontinua estudu to’o iha Portugal.
“Ha’u sente katak ami bele kaer nafatin Prezidente Repúblika nia lia-fuan hodi kontinua ami-nia estudu iha Portugal,” Jonas Barreto Lopes hatete.
(eme)
