LETEFOHO, STLTIMORLESTE.com – Xefe Estadu-Maior FALINTIL-Forsa Defeza Timor-Leste (F-FDTL), Brigadeiru Jenerál José da Costa Soares “TRIX”, fó palestra kona-ba istória luta libertasaun nasionál ba formandus fúnsionáriu públiku iha Letefoho, Ermera.
Palestra ne’e hala’o iha Rezidénsia Madidi, durante Formasaun Karakter Turnu II, Períodu 2026, ne’ebé dura durante semana tolu, Sesta nee (09/10/2026).
Atividade ne’e ho tema “Istória Luta Libertasaun Nasionál Timor-Leste: Rezisténsia ba Independénsia — Povu Ida, Kauza Ida, Futuru Ida”.
Komunikadu Impresa F-FDTL ne’ebé STL asesu hateten katak, palestra ne’e nia objetivu mak atu aumenta koñesimentu formandus sira kona-ba istória luta libertasaun nasionál.
Brigadeiru Jenerál José da Costa Soares esplika papél istóriku FALINTIL no kontribuisaun povu Timor-Leste iha luta ba restaurasaun independénsia.
Nia afirma katak, istória luta libertasaun nasionál reprezenta patrimóniu istóriku no parte importante identidade nasionál, ne’ebé presiza transmite ba jerasaun foun no futuru.
Palestra ne’e mós fó oportunidade ba formandus atu reflete kona-ba unidade, patriotizmu, disiplina, responsabilidade no espírito sakrifísiu, nu’udar valór importante iha luta povu Timor-Leste ba liberdade.
“Valór sira ne’e sai baze ba formandus atu hala’o kna’ar ho responsabilidade no integridade nu’udar fúnsionáriu públiku,” nia dehan.
F-FDTL kontinua promove edukasaun kona-ba istória luta libertasaun nasionál hodi hametin konsiénsia nasionál, liuliu entre jerasaun foun.
Inisiativa ne’e mós buka hametin kompromisu formandus sira iha servisu públiku, hodi kontribui ba dezenvolvimentu, estabilidade no futuru Timor-Leste.
(jen)
