DILI, STLTIMORLESTE.com – Membru Polísia Nasional Timor-Leste (PNTL) na’in tolu (3) remata formasaun investigasaun krime sibernétiku iha Bangkok, Tailándia, ho apoiu Estadus Unidus Amérika.
Embaixada Estadus Unidus Amérika iha Dili, liuhosi komunikadu imprensa ne’ebé STL asesu ba, Sesta (09/10/2026), informa katak formasaun ne’e hala’o hosi 14 to’o 18 Setembru 2026, iha International Law Enforcement Academy (ILEA), Bangkok.
Programa ne’e halibur profisionál aplikasaun lei husi Sudeste Aziátiku atu hametin kapasidade deteta, investiga no lori kazu krime sibernétiku ba prosesu justisa.
Partisipante sira aprende kona-ba uza aplikasaun dijitál iha krime organizadu, inklui jogu online, fraude no brankeamentu kapitál.
Formasaun ne’e mós inklui prátika kona-ba jestaun dispozitivu eletróniku, prezervasaun evidénsia dijitál no apreensaun laptop no telemóvel.
Ofisiál Seguransa Rejionál Embaixada EUA, Chasen Peabody, afirma katak apoiu ne’e importante atu dezenvolve kapasidade investigasaun no hametin kooperasaun hasoru ameasa transnasionál.
“Ofisiál PNTL iha papél importante atu proteje seguransa nasionál no rejionál. EUA orgullu apoia sira-nia dezenvolvimentu profisionál liuhosi programa ILEA,” Chasen Peabody hatete.
Ajente Prinsipál PNTL, Jacob Rito da Costa Belo, dehan katak matéria formasaun nian iha relevánsia direta ba kazu sira ne’ebé akontese iha Timor-Leste, liuliu jogu online.
Nia esplika katak, formasaun ne’e fó koñesimentu kona-ba oinsá kriminozu sira uza aplikasaun dijitál atu hala’o fraude, krime organizadu no brankeamentu kapitál.
“Ha’u sei aplika koñesimentu ne’ebé ha’u aprende, liuliu kona-ba jogu online, prezervasaun evidénsia dijitál no apreensaun dispozitivu eletróniku,” Jacob Rito da Costa Belo hatete.
EUA afirma katak sei kontinua apoia instituisaun aplikasaun lei Timor-Leste nian atu hametin kapasidade investigasaun, hasa’e profisionalizmu no aprofunda kooperasaun rejionál.
Apoiu ne’e nia objetivu mak hametin seguransa hamutuk no ajuda prevene ameasa sibernétika ne’ebé bele afeta Timor-Leste no Estadus Unidus Amérika.
(dom)
