DILI, STLTIMORLESTE.com – Estudantes finalista sira husi Ensinu Baziku Central (EBC) Manleuana presiza prepara an liuhusi estudu intensivu atu partisipa iha ezame nasionál no ezame lokál, ne’ebé sei hala’o iha loron 19 fulan Outubru tinan 2026.
Diretór EBC Manleuana, Carlos Correia, hato’o informasaun ne’e ba STL, Sesta-feira (09/10/2026).
Carlos husu ba estudante finalista sira atu aproveita tempu ne’ebé iha hodi prepara an didi’ak, tanba rezultadu ne’ebé sira sei hetan depende mós ba esforsu no preparasaun individuál durante prosesu aprendizajen.
“Nafatin husu ba estudante finalista sira atu prepara an liuhusi estudu, hodi hein ezame nasionál no ezame lokál ne’ebé sei hala’o iha loron 19 fulan ne’e. Atu hetan valor di’ak iha ezame refere, depende ba esforsu ne’ebé estudante sira halo, tanba tempu besik ona atu tuir ezame rua ne’e,” nia dehan.
Carlos hatutan katak, preparasaun eskola nian to’o agora lao di’ak hanesan baibain, tanba profesór sira husi disiplina ida-idak kontinua hala’o prosesu ensinu no aprendizajen ba estudante sira tuir programa ne’ebé planeia ona.
“Ami nia atividade prosesu ensinu no aprendizajen ba estudante sira kada loron kontinua lao hanesan,” dehan nia.
(jac)
