DÍLI, STLTIMORLESTE.com – Xefe Aldeia Kalohan, Suku Manelima, Postu Administrativu Laclubar, Munisípiu Manatuto, husu Bee Timor -Leste (BTL) atu aumenta instalasaun torneira bee hodi fasilita komunidade ne’ebé hela dook asesu ba bee moos.
Preokupasaun ne’e hato’o husi Xefe Aldeia Kalohan, Benjamin Sarmento, ba STL liuhusi telefone husi Laclubar, Sesta (9/10/2026).
Nia hateten katak, to’o agora komunidade Kalohan balun asesu ona ba bee moos, maibé família balun seidauk hetan asesu tanba distánsia entre sira-nia uma no torneira bee ne’ebé eziste agora.
Nia esplika katak, iha família lima ne’ebé hela dook no tenke lao to’o 100 metru husi sira-nia uma atu kuru bee.
Kondisaun ne’e halo komunidade hasoru difikuldade atu hetan bee ba nesesidade loroloron, inklui te’in no konsumu.
Tanba ne’e, nia husu ba BTL atu aumenta instalasaun torneira bee iha fatin ne’ebé besik komunidade, liuliu família sira ne’ebé seidauk asesu fasil ba bee moos.
“Hau presiza aumenta tan instalasaun torneira bee, tanba komunidade balun hela dook,” dehan Benjamin.
Nia mós konta katak, husi tempu Indonézia to’o Timor-Leste ukun rasik aan, komunidade iha área ne’e hasoru difikuldade atu hetan bee, no antes ne’e sira depende ba bee mota atu sustenta nesesidade loroloron.
Maski programa PNDS realiza ona projetu bee moos iha área ne’e, nia dehan katak torneira bee balun sei dook husi komunidade, nune’e família sira tenke kontinua lao distánsia dook atu kuru bee.
Ho situasaun ne’e, Xefe Aldeia Kalohan hein katak BTL bele fó atensaun ba nesesidade komunidade nian, liuhusi aumenta torneira bee iha fatin estratéjiku atu asegura família sira, liuliu ne’ebé hela dook, bele asesu ba bee moos ho fasilidade.
(joa)
