DÍLI, STLTIMORLESTE.com – Embaixadór Japaun iha Timor-Leste, Yamamoto Yasushi afirma katak, Festivál Japaun 2026 sai oportunidade importante atu hametin amizade no promove komprensaun kulturál entre Timor-Leste ho Japaun.
Lia hirak ne’e hato’o husi Embaixadór Yamamoto Yasushi, liuhusi nia diskursu iha abertura Festivál Japaun 2026, neebe bé hala’o iha Timor Plaza, Sábadu (10/10/2026).
Nia esplika katak, Japaun koñesidu nu’udar Rai Loro-matan Sa’e nian, hanesan Timor-Leste ne’ebé mós koñesidu nu’udar Rai Lorosa’e.
Nasaun rua ne’e fahe loro-matan ne’ebé hanesan, no harii ona relasaun bazeia ba konfiansa, amizade no respeitu ba kultura ida-idak.
Embaixadór Yamamoto hateten katak, aleinde sai parseiru iha dezenvolvimentu, Timor-Leste no Japaun mós sai belun ne’ebé valoriza no respeita kultura malu.
Nia espera katak festivál ne’e bele fó oportunidade ba povu Timoroan atu esperiénsia diretamente kultura Japaun nian, inklui arte marsiais Budo, karaoke, múzika no hahán tradisionál.
Iha fatin hanesan, Sekretáriu Estadu Arte no Kultura, Jorge Soares Cristovao hateten katak, nia sente onradu atu partisipa iha atividade kulturál anual ne’e, ne’ebé aprezenta elementu oioin husi kultura Japaun, inklui arte marsiais tradisionál, múzika no hahán.
Nia lori Ministériu Juventude, Desportu, Arte no Kultura nia naran, hato’o parabéns ba Governu Japaun liuhusi Embaixada Japaun iha Timor-Leste tanba organiza atividade ne’e.
Jorge Soares Cristovao apresia komisaun organizadora nia esforsu atu aprezenta kultura no tradisaun Japaun nian, no subliña katak atividade hanesan ne’e importante atu hametin amizade no unidade entre Timor-Leste ho Japaun.
Nia mós enfatiza katak, envolvimentu juventude Timoroan iha atividade kulturál hanesan ne’e sai oportunidade atu hatudu no preserva kultura, tradisaun no identidade nasional ba jerasaun tuir mai.
(joa)
