DILI, STLTIMORLESTE.com – Xefe Estadu-Maior FALINTIL-Forsa Defeza Timor-Leste (F-FDTL), Brigadeiru Jenerál José da Costa Soares “TRIX”, rekoñese kontribuisaun militár Forsa Apoiu Jerál (FAG) iha komemorasaun iha Metinaru.
Serimónia komemorativa Loron Forsa Apoiu Jerál (FAG) hala’o iha Metinaru, Sábadu (10/10/2026), ho partisipasaun lideransa no membru F-FDTL.
Nia dehan katak, FAG iha papél importante hodi garante apoiu lojístiku, operasionál no prontidaun ba F-FDTL.
“Ho onra boot mak ha’u mai hamutuk iha selebrasaun Loron Forsa Apoiu Jerál nian, atu rekoñese ema hotu ne’ebé kontribui ba dalan ne’ebé ita lao hamutuk,” hatete Xefe Estadu-Maior F-FDTL, Brigadeiru Jenerál José da Costa Soares “TRIX” ba jornalista sira liu husi nia deskurus iha Metinaro, Sábadu (10/10/2026).
Nia esplika katak, Metinaru sai sentru apoiu ba Forsa tomak, tanba CICNL, Unidade Apoiu ba Servisu (UAS), Kompañia Enjeñaria no Transmisaun hala’o knaar importante iha área ne’e.
“La ho apoiu, laiha operasaun; no laiha sustentasaun, laiha prontidaun,” nia informa.
Nia hato’o rekoñesimentu ba komandante FAG, komandante CICNL, komandante unidade no kompanhia sira, inklui ofisiál, sarjentu no prasa ne’ebé servisu ho abnegasaun.
Nia hateten katak, atribuisaun louvor no medalla reprezenta rekoñesimentu instituisaun ba militár sira ne’ebé hatudu kompeténsia, responsabilidade no ezemplu di’ak.
“Ha’u konsiente katak sei iha buat barak atu halo. Ekipamentu, meiu no infraestrutura sei falta, maibé ita kontinua servisu atu ultrapasa difikuldade hirak ne’e,” nia deklara.
“TRIX” mós apela ba militár FAG atu mantein disiplina, respeitu, onestidade no koezaun interna entre superior, subordinadu, unidade no jerasaun sira.
Nia subliña katak, forsa instituisaun la sukat de’it husi ekipamentu no infraestrutura, maibé mós husi karakter, dedikasaun no responsabilidade militár ida-idak.
Nia fó omenajen ba militár FAG no komandante sira ne’ebé lakon ona, ne’ebé kontribui ba konstrusaun no dezenvolvimentu F-FDTL.
Nia mós agradese asesór internasionál sira ba kooperasaun no kamaradajen, no husu militár FAG atu kontinua servisu ho orgullu, rigor no lealdade ba Pátria no Povu Timor-Leste.
Iha serimónia hanesan, Komandante Forsa Apoiu Jerál, Tenente-Koronél João Bosco Ximenes “LENOK”, hateten katak, komemorasaun ne’e sai momentu importante ba militár feto no mane sira atu reflete kona-ba pasadu no dezenvolvimentu instituisaun.
“Ohin ita marka tan istória ida ne’ebé hola parte ba pasu dezenvolvimentu instituisaun FALINTIL-FDTL nian,” nia deklara.
Nia esplika katak, serimónia ne’e fó oportunidade ba militár sira atu avalia servisu ne’ebé hala’o ona, reafirma fiélidade ba komandu no hametin kompromisu ba nasaun.
Nia mós afirma katak, maski F-FDTL hasoru dezafiu oioin, lideransa no vizaun komandu kontinua lori instituisaun ba modernizasaun no profisionalizmu.
“LENOK” hato’o agradese ba Xefe Estadu-Maior-Jenerál F-FDTL, Tenente-Jenerál Domingos Raúl “Falur Rate Laek”, tanba fó fiar ba nia atu asume knaar nu’udar Komandante FAG.
Nia mós rekoñese kontribuisaun komandante CICNL, UAS, Kompañia Independente Enjeñaria no Transmisaun, inklui ofisiál, sarjentu no prasa sira, ba dezenvolvimentu unidade no instituisaun.
Komandante FAG hato’o agradese ba forsa defeza Austrália, Portugal, Xina, Estadu Unidu Amérika, Nova Zelandia no Japaun, ne’ebé fó apoiu ba formasaun, ekipamentu no infraestrutura militár.
Nia hateten katak, FAG mak komponente fundamental ida iha F-FDTL, ho misaun ne’ebé define iha Estatutu Orgániku F-FDTL, Dekretu-Lei Nú. 26/2023, Artigu 37.
Misaun hirak ne’e inklui apoiu kombate, apoiu servisu ba operasaun, apoiu supletivu ba autoridade sivíl, apoiu ba kompromisu internasionál no formasaun militár.
Nia husu militár hotu atu hala’o knaar ho firmeza, domin, matenek, disiplina no responsabilidade, tuir lei no orden komandu F-FDTL.
“Medalla no louvor ne’e mós sai rezultadu husi apoiu, pasiénsia no orasaun família no ema hotu ne’ebé akompaña militár sira,” nia deklara.
Iha remata, Komandu F-FDTL, liuhusi Komandu FAG, hato’o parabéns ba militár kondekoradu no simu louvor, no apela atu kontinua servisu ba instituisaun, Povu no Nasaun Timor-Leste ho abnegasaun no profisionalizmu.
(jen)
