Liquiçá, 11 Outubru 2026 — Nélio Mau Quinta ofisialmente sai Xefe Suku Eleitu ba Suku Beduku ba períodu 2026–2032. Prosesu apuramentu eleisaun ne’e hetan akompañamentu no monitorizasaun direta husi Ministériu Administrasaun Estatál (MAE), liuhusi Diretór Jerál Desentralizasaun no Governu Lokál (DGDGL), António Augusto Guterres, hamutuk ho ekipa iha Munisípiu Liquiçá.
Atividade monitorizasaun ba apuramentu ne’e hala’o hamutuk ho Prezidente Autoridade Munisípiu (PAM) Liquiçá, Administradór Postu Administrativu (APA) Bazartete, Komandante Polísia Nasionál Timor-Leste (PNTL) Munisípiu Liquiçá, no Komisária husi Komisaun Nasionál Eleisaun (CNE), hodi asegura katak prosesu kontajen de votus ba suku foun ne’ebé kompostu husi aldeia tolu (3) ne’e la’o ho transparente, lais, no seguru.
Prosesu kontajen no apuramentu votus ne’ebé la’o husi horisehik to’o ohin loron konklui ho susesu. Rezultadu definitivu hatudu katak kandidatu Nélio Mau Quinta sa’e ba oin hodi alkansa votus hamutuk 509 (79%), enkuantu kandidatu António Pereira hetan votus 114 (18%).
Liu husi monitorizasaun ne’e, Ministériu Administrasaun Estatál (MAE) hatudu kompromisu hodi hametin prosesu demokrasia iha nível lokál, nune’e Xefe Suku eleitu bele lidera no hatutan dezenvolvimentu servisu públiku ne’ebé di’ak liu tan ba komunidade sira iha Suku foun Beduku.
(stl/jan)
