DILI, STLTIMORLESTE.com — Gruta Santo António iha Oe-Cusse Ambeno la’ós de’it fatin espiritual, maibé mós patrimóniu istóriku ne’ebé halibur identidade no sentidu pertença komunidade nian.
Deputadu Bankada FRETILIN, Antoninho Doutel Sarmento, hato’o komentáriu ne’e bainhira vizita Gruta Santo António.
Nia hateten katak, fatin ne’e fó sentimentu hakmatek ba ema ne’ebé tama ba gruta nia laran.
“Fatin ne’e hakmatek no nakonu ho sentimento pertença, bainhira tama ba gruta nia laran,” dehan deputadu Antoninho Doutel Sarmento ba STL, iha Dili, Segunda (12/10/2026).
Nia mós hatudu katak iha gruta nia laran, hakerek ho liafuan oioin ne’ebé bele haree iha fatin ne’e. Entre liafuan sira ne’ebé hakerek iha gruta mak, liafuan ho naran hanesan “EKE HASANTO ANTÓNIO MILAGROJO BI LOKNIO”, “EKE NAHUN BARTOLOMEU Bankae ON ASKAUT, “JACINTA HORNAI APIN PAKU – JUANA MODO APIN PAKU”, “SUFAF KAUF HORNAI EKE NA”.
Vizitante sira ba, halo meditasaun no orasaun ba Santo António, bele hare mos liafuan sira nudar inspirasaun no transformasaun moris ne’ebé iha ligasaun ho esperiénsia no relasaun moris komunidade sarani sira nian, no mos visitantes sira. Alende ne’e, iha mos estátua Nossa Senhora Viragem Maria, Mãe de Graça. Prejensa Santo Antonio, ho Nain Feto Virgem Maria iha Gruta hanesan, simboliza proximidade espiritual ne’ebé forte entre devosaun ba Nain Feto Virgem Maria, no Santo António nia domin boot ba nia. Tamba Santo António hare Nain Feto Virgem Maria nudár inan ne’ebé laran sadia, intersesora iha orasaun, no ezemplu fiar nian ne’ebé prefeitu.
Komunidade Oe-Cusse, José Punef, mós hateten katak Gruta Santo António iha signifikadu boot ba populasaun lokál, tanba fatin ne’e fó oportunidade ba ema atu reflete an no hametin relasaun espiritual no kultural.
“Ha’u rasik sente orgullu no kontenti tebes bainhira haree fatin istóriku ne’e kontinua sai fatin ne’ebé dada ema nia atensaun,” dehan José Punef.
Nia konsidera gruta ne’e nu’udar patrimóniu kultural ne’ebé presiza tau matan no valoriza, atu jerasaun tuirmai bele kontinua hatene no preserva istória Oe-Cusse nian.
Entretantu inskrisaun no naran sira ne’ebé husik hela iha gruta nia laran sai marka kona-ba ligasaun entre ema no fatin ne’e.
Preservasaun patrimóniu ne’e importante atu identidade, no memória istórika komunidade Oe-Cusse nian bele kontinua moris ba jerasaun tuirmai.
(car)
