DILI, STLTIMORLESTE.com – Ekipa husi Container Tais hato’o pedidu Konaba Horta Show ba Prezidente Republika (PR), Jose Ramos Horta.
Prezidente Repúblika José Ramos-Horta, enkontru ho CEO ka fundador NAFEX Art & Container Tais, Natalino Fernandes Ximenes, hamutuk ho ekipa, atu hato’o pedidu kona-ba realizasaun programa Horta Show iha espasu Container Tais.
Depois de enkontru ne’e, Natalino Fernandes Ximenes ko’alia ba jornalista sira iha Palásiu Prezidensiál Nicolau Lobato, iha bairru Pité, Dili, Segunda (12/0/10/2026) hatete, katak objetivu husi enkontru ne’e mak atu halo aprosimasaun ho Prezidente Repúblika no hato’o pedidu atu realiza programa Horta Show.
“Ami nia objetivu husi ekipa ida-ne’e mak atu halo aprosimasaun no enkontru ho Sua Exelénsia Prezidente Repúblika, atu hato’o pedidu ida kona-ba realizasaun Horta Show iha ita-nia espasu Container Tais, iha IOB,” dehan Natalino.
Natalino esplika katak, Prezidente Repúblika simu ho di’ak inisiativa ne’e no hatudu disponibilidade atu partisipa iha eventu refere. Maibé, data realizasaun sei depende ba ajenda Prezidente, inklui viajen ba rai-li’ur.
“Prezidente sei mai partisipa, maibé sei konveniente atu haree uluk Prezidente nia ajenda, tanba iha mos viajen ba rai-li’ur. Nune’e, ohin ami mai atu introdús no esplika kona-ba inisiativa ne’ebé ami hala’o, ne’ebé liga ho indústria kulturál no kreativa, liuhusi Container Tais ne’ebé agora dadaun harii ona,” nia hateten.
Natalino mós temi katak, iha enkontru ne’e, ekipa lori joven Nadia, ho idade tinan 11, atu aprezenta no kanta músika ida ne’ebé prepara espesialmente ba programa Horta Show.
“Tanba ami haree katak programa Horta Show sempre simu konvidadu espesial husi embaixada sira no realiza atividade oioin, ami hanoin katak di’ak mos se ami bele kontribui ho ideia no kria músika espesial ida ho títulu Horta Show, ne’ebé sei kanta husi ami-nia ekipa, liuhusi alin Nadia,” dehan Natalino.
Nia hatutan katak, Prezidente Repúblika José Ramos-Horta sente kontente bainhira rona kona-ba inisiativa ne’e no sei haree tempu ne’ebé adekuadu atu partisipa iha eventu ne’ebé sei organiza husi Container Tais.
Maski nune’e, data ofisiál ba realizasaun Horta Show seidauk determina. Ekipa sei halo koordenasaun ho asesora Prezidénsia Repúblika, Sandra, no ekipa média Prezidénsia, atu determina data ne’ebé apropriadu.
Iha enkontru ne’e, sira mós ko’alia kona-ba ezisténsia no papel Container Tais, inklui programa oioin ne’ebé hala’o hela ho apoiu husi Governu Timor-Leste, Gabinete Sosiedade Sivil no parseiru sira seluk.
Aleinde atividade sira ne’e, Natalino hateten katak ekipa mos dezenvolve plataforma dijitál ida ho naran Timor Kreativu, ne’ebé sei sai hanesan meiu atu ajuda Timoroan sira hetan asesu ba informasaun kona-ba oportunidade finansiamentu no bolsa ba projetu sira iha setór indústria kulturál no kreativa.
“Ho programa sira ne’e, ami dezenvolve mos plataforma dijitál ida ho naran Timor Kreativu. Ami husu apoiu husi Sua Exelénsia Prezidente atu, iha futuru, ami bele halo aprosimasaun ho embaixada hotu-hotu iha Timor-Leste, atu hetan informasaun kona-ba fundu no bolsa sira, hodi integra informasaun ne’e iha plataforma. Nune’e, Timoroan sira bele asesu no uza informasaun ne’e ba sira-nia atividade no projetu iha setór indústria kulturál no kreativa,” nia remata.
(eme)
