DILI, STLTIMORLESTE.com — Governu la prepara sedu atu enfrenta El Niño, povu mak sei susar ho ameasa falta bee-moos no aihan, liuliu família rurais ne’ebé depende ba agrikultura.
Mudansa klimátika no udan menus bele afeta produsaun agríkola, liuliu iha área rurais ne’ebé komunidade depende ba bee atu kuda hare no ai-han.
Bainhira bailoron naruk, falta bee bele hamenus produsaun no aumenta risku inseguransa alimentar.
Situasaun ne’e husu Governu atu prepara planu konkretu antes krize akontese.
Medida preventiva importante atu garante disponibilidade aihan, no bee-moos ba komunidade sira ne’ebé vulnerável ba impaktu El Niño.
Akademista Universidade Nacional Timor Lorosa’e (UNTL), Frederico da Silva, hato’o preokupasaun kona-ba nesesidade Governu atu foti medida sedu, la’ós hein to’o krize mosu mak foin buka solusaun.
“Governu labele hein to’o krize akontese mak foin buka solusaun. Presiza iha planu konjunta no istoke aihan nune’e mós fasilidade bee-moos ne’ebé sufisiente iha munisípiu sira ne’ebé vulnerável,” hateten Frederico da Silva ba STL, iha Dili, iha Akait, Dili, Segunda (12/10/2026).
Frederico propoin atu Governu garante rezerva hare no aihan báziku iha armazen nasionál, reabilita sistema irigasaun no prepara distribuisaun bee-moos ba área sira ne’ebé dala barak enfrenta falta bee durante bailoron.
Nia mós subliña katak alokasaun orsamentu adekuadu no planu estratéjiku importante atu prevene risku falta aihan, liuliu ba família rurais ne’ebé depende ba produsaun agríkola atu sustenta sira-nia moris.
Iha parte seluk, observadór ambiente, Romaldo de Jesus, alerta katak degradsaun ambientál bele aumenta impaktu mudansa klimátika.
Tanba ne’e, nia konsidera protesaun ba bee-matan no floresta nu’udar parte importante husi preparasaun atu enfrenta fenómenu ne’e.
“Ita tenke hare katak la’ós de’it asuntu agrikultura, maibé protesaun ba bee-matan no floresta mak sai xave prinsipál atu asegura sustentabilidade meiu ambiente nian iha tempu mudansa klimátika,” dehan Romaldo de Araujo.
Romaldo hatutan katak, konsiénsia públika no desizaun polítika ne’ebé fó prioridade ba biodiversidade no jestaun rekursu naturál importante, atu hamenus risku dezastre ekolójiku ne’ebé bele afeta moris loron-loron povu nian.
(car)
