DILI, STLTIMORLESTE.com — Lista provizória ne’ebé Sentru Formasaun Jurídika no Judisiária (SFJJ) publika hatudu katak kandidatu nain 21 mak liuhosi teste eskrita ba konkorsu rekrutamentu ba vaga Juiz iha Supremu Tribunal Justisa (STJ), enkuantu kandidatu nain 11 la liuhosi faze ida-ne’e.
Kandidatu sira ne’ebé hetan rezultadu aptu iha faze teste eskrita ba vaga Juiz iha STJ inklui Juiz Afonso Carmona, Albertina da Conceição das Neves, Ana Paula Fonseca Monteiro de Jesus, António José Fonseca Monteiro de Jesus, Arjentino Luisa Nune’e no Juiz Deolindo dos Santos.
Kandidatu seluk ne’ebé hetan rezultadu aptu mak Juiz Durante Tilman, Juíza Edite Palmira dos Reis, Juíza Ersília de Jesus, Francisca Marques Cabral, Ivan José Suritai Patrocino António, Jacinta Correira da Costa, João Ribeiro, Juiz José Quintão Soares Celestino, Jumiaty Maria Freitas, Maria Natercia Gusmão Pereira no Zulmira Auxiliadora Barros da Silva.
Ba vaga ne’ebé destina ba prokuradór, kandidatu Adérito António Pinto Tilman mak hetan rezultadu aptu iha faze teste eskrita.
Enkuantu ba vaga advogadu, kandidatu tolu ne’ebé hetan rezultadu aptu mak Bárbara Nazareth Andrade de Oliveira, Francisco José Lay de Sousa Assis Nicolau no José Pereira da Conceição.
Ba vaga Juiz, kandidatu na’in ualu ne’ebé la hetan rezultadu aptu mak Juiz António Hélder Viana do Carmo, Juíza Florencia Freitas Soares, Juiz Hugo da Cruz Pui, Juiz José António de Jesus Escurial da Silva Faria, Juiz José Maria de Araújo, Juíza Maria Modesta de Almeida Vieira, Juíza Maria Solana da Conceição Soares Fernandes no Juiz Samuel da Costa Pacheco.
Ba vaga prokuradór, kandidatu Matias Soares no Vicente Fernandes e Brito la hetan rezultadu aptu.
Enkuantu ba vaga advogadu, kandidatu Câncio Xavier mak la hetan rezultadu aptu iha faze teste eskrita.
Lista provizória kandidatu sira ne’ebé hetan rezultadu aptu no la aptu iha faze teste eskrita ba konkorsu rekrutamentu Juiz, Prokuradór no Advogadu ba STJ publika ona iha kuadru avizu Sentru Formasaun Jurídika no Judisiária, Kaikoli.
Antes ne’e, Prezidente Komisaun Rekrutamentu Avelino Coelho deklara katak, tuir regra, bainhira rezultadu sai no iha kandidatu sira ne’ebé la konkorda ho rezultadu, sira iha tempu ba sira atu submete rekursu.
Nia esplika katak, rekursu tenke dirije ba júri, la’ós ba Komisaun Rekrutamentu ka Konsellu Superior Majistratura Judisiál.
Kandidatu sira ne’ebé hetan rezultadu aptu iha teste eskrita sei kontinua ba faze tuir mai, ne’ebé mak teste entrevista.
(ter)
