DILI, STLTIMORLESTE.com – Primeiru-Ministru Kay Rala Xanana Gusmão kestiona desizaun Tribunál Díli kona-ba arguidu sira iha kazu Scam Call Centre no husu jornalista atu intensifika kobertura sistema justisa.
Xanana Gusmão hatete katak, krime organizadu transnasionál presiza hetan asaun rigorozu, inklui investigasaun no prosesu judisiál ba ema hotu ne’ebé envolve.
“Krime organizadu hanesan ne’e la’ós akontese dala ida de’it. Ita tenke kontinua kaer no prosesu sira, tanba depois ita para, sira mai fali,” hatete Primeiru-Ministru (PM)Kay Rala Xanana Gusmão ba jornalista sira iha MI Caicoli Dili, Segunda-feira (12/10/2026).
Nia mós hateten katak, sidadaun estranjeiru balu ne’ebé envolve iha atividade ne’e, inklui husi Indonézia no Xina, sai ona husi Timor-Leste.
Xanana Gusmão husu jornalista sira atu halo kobertura kle’an kona-ba sistema justisa, hodi fó sai ba públiku desizaun tribunál no nia impaktu ba sosiedade.
“Juís sira hatene lei, maibé imi, jornalista sira, mak tenke hakilar. La’ós ha’u, tanba tribunál mak liberta sira,” nia deklara.
Xefe Governu kompara kazu ne’e ho kazu feto ida iha área fronteira ne’ebé hetan pena prizaun tinan rua tanba hatama tabaku, maski nia konsidera sala ne’e menus grave.
Nia lamenta katak, ema ne’ebé suspeitu envolve iha Scam Call Centre, ne’ebé nia dehan kauza prejuízu to’o US$ 42 millaun, bele hetan desizaun tribunál atu sai husi detensaun.
Primeiru-Ministru subliña katak, Timor-Leste labele tolera krime organizadu transnasionál, no husu atu prevene estranjeiru sira uza territóriu nasionál ba atividade ilegál.
Iha parte seluk, Ministru Interiór (MI) Francisco da Costa Guterres esplika,Governu halo hela esforsu atu reorganiza regra kona-ba vistu turista, liuhusi despaixu ministeriál no analiza prosedimentu atu kontrola atividade ilegál.
Ministru Interiór hatutan, vistu turista permite ema tama no hela iha Timor-Leste durante loron 30, ho posibilidade atu halo prorrogasaun dala ida de’it.
“Kona-ba krime online no Scam, ami halo ona diskusaun no husu orientasaun Primeiru-Ministru. Ami estuda ona no haree katak tenke hapara prorrogasaun vistu turista,” nia deklara.
Nia mós husu autoridade sira atu tau matan ba estranjeiru ne’ebé hela kleur iha Timor-Leste, liuliu sira ne’ebé tama ho vistu turista.
Ministru Interiór husu atu halo verifikasaun bainhira turista ida hela liu semana ida ka rua, atu asegura katak sira la envolve iha atividade ilegál.
(jen)
