DILI, STLTIMORLESTE.com – Kondisaun sala aula aat iha Eskola Ensinu Filial (EBF) 1, 2 Bora afeta prosesu aprendizajen estudante sira, liu-liu bainhira udan, tanba bee tama ba sala laran.
Preokupasaun ne’e hato’o husi Koordenadora EBF 1.2 Bora, Munisipiu Manatuto, Rosa Amaral, ba STL liuhusi telefone, Segunda (12/10/2026).
Rosa Amaral hatete katak, eskola ne’e iha estudante hamutuk na’in 178, sala aula hamutuk ne’en no profesór na’in lima ne’ebé troka malu atu hanorin.
Nia esplika katak, maski kadeira sufisiente, meza ne’ebé disponivel seidauk to’o atu uza estudante hotu, tanba estudante na’in tolu ka haat tenke uza meza ida. Aleinde ne’e, husi sala aula ne’en, sala tolu nia kakuluk aat, no janela no odamatan balun mós estragadu.
“Kuandu udan, estudante sira tenke fahe ba grupu, maibé ami halibur estudante hamutuk iha grupu balun tanba bee udan suli tama ba sala laran. Prosesu aprendizajen kontinua, maibé dala ruma la lao ho di’ak,” dehan Koordenadora.
Nia hatutan katak, durante tempu bailoron, sala aula ne’ebé nia kakuluk di’ak bele uza ho di’ak, maibé bainhira udan, bee tama ba sala aula ne’ebé nia kakuluk aat, ne’ebé halo estudante sira hasoru difikuldade atu aprende.
Nia mós preokupa katak, janela no odamatan ne’ebé aat bele hamosu risku ba livru no materiál aprendizajen, tanba bee udan bele tama ba sala laran.
Tanba ne’e, Rosa Amaral husu ba Ministériu Edukasaun (ME) no Munisipál Edukasaun atu fó atensaun ba kondisaun infraestrutura eskola nian, hodi garante estudante sira bele aprende ho di’ak no profesór sira bele hanorin iha fatin ne’ebé seguru.
“Ami sujere ba Ministériu Edukasaun atu hadi’a kondisaun eskola, atu labarik sira bele aprende ho di’ak no profesór sira mós bele hanorin iha fatin ne’ebé seguru,” dehan nia.
Nia relata katak, iha fulan Marsu liubá, anin boot sobu parte husi kakuluk eskritóriu eskola nian. Maski problema ne’e relata ona ba autoridade relevante, to’o agora eskola seidauk hetan asisténsia urjente atu hadi’a estragu ne’e.
Nia esplika katak, eskola tenta halo proposta atu hadi’a infraestrutura, maibé orsamentu konsesaun eskolar ne’ebé disponivel la to’o atu atende nesesidade hotu. Eskola konsege halo manutensaun ki’ik balun, inklui troka janela ne’ebé aat, maibé problema prinsipál sira seidauk rezolve.
Rosa Amaral mós hato’o sentimentu triste tanba haree eskola balun iha fasilidade sufisiente, enkuantu eskola seluk kontinua enfrenta problema infraestrutura ne’ebé afeta estudante no profesór sira.
Iha fatin hanesan, profesór Franco Soares konfirma katak husi sala aula hamutuk ne’en, sala tolu nia kakuluk aat. Nia mós hato’o preokupasaun kona-ba janela no odamatan ne’ebé estragadu, tanba kondisaun ne’e halo rai livru no materiál eskolar la seguru.
“Ami sujere ba Ministériu Edukasaun atu aproveita tempu bailoron ne’e hodi atende no hadi’a kondisaun eskola ami nian,” dehan Franco Soares.
Nia haktuir katak, durante tempu bailoron, atividade hanorin no aprende bele lao ho di’ak, maibé bainhira udan, bee ne’ebé tama ba sala aula halo prosesu aprendizajen sai difisil.
Tanba ne’e, Koordenadora Rosa Amaral no profesór Franco Soares husu ba autoridade relevante atu tau matan ba kondisaun infraestrutura EBF 1.2 Bora, hodi garante ambiente aprendizajen ne’ebé seguru no apropriadu ba estudante no profesór sira.
(joa)
