DILI, STLTIMORLESTE.com – Komunidade Lafulau, Postu Administrativu Laclubar, Munisipiu Manatuto, preokupa estrada aat ne’ebé difikulta transporte no impede produtu lokál sira asesu merkadu.
Preokupasaun ne’e hato’o husi Xefi Aldeia Lafulau, José Ferreira, ba STL liuhusi telefone iha Manatuto, Segunda (12/10/2026).
José Ferreira hatete, katak komunidade sira sente terus tanba kondisaun estrada aat ne’ebé durante tinan haat ona seidauk hetan solusaun.
Situasaun ne’e afeta movimentu komunidade no atividade ekonomia, liuliu fa’an produtu agríkola ba merkadu.
“Ha’u sente triste haree komunidade nia terus ne’e,” dehan José.
Nia esplika katak, uluk kompania ida halo reabilitasaun estrada, maibé agora servisu ne’e para ona, enkuantu komunidade kontinua enfrenta difikuldade tanba kondisaun estrada ne’ebé aat.
Tuir nia, durante tempu bailoron transporte sei bele halo movimentu, maibé bainhira tempu udan, estrada sai aat liután no kareta sira hasoru difikuldade atu liu.
Kondisaun estrada ne’e mós afeta agrikultór sira ne’ebé hakarak fa’an produtu lokál, hanesan abokate, ai-nanas no produtu seluk.
Tanba transporte difisil, produtu balun estraga molok to’o merkadu, no produtu ne’ebé konsege to’o merkadu mós la hetan folin ne’ebé di’ak.
“Ema la sosa tanba estrada aat.
Komunidade sira ba merkadu dala ida de’it iha semana ida, tanba kareta atu halo movimentu mós susar tebes,” dehan nia.
José Ferreira hatutan katak, distánsia husi komunidade ba postu administrativu besik kilómetru 12, ne’ebé aumenta tan difikuldade ba komunidade atu asesu merkadu no servisu seluk.
Tanba ne’e, nia husu ba ministériu relevante atu tau matan ba kondisaun estrada iha Lafulau, atu komunidade bele hetan asesu transporte ne’ebé di’ak no fa’an sira-nia produtu lokál ho fasilidade.
(joa)
