DILI, STLTIMORLESTE.com – Eskola Ensinu Básiku Filial (EBF) 1.2 Bora, Munisípiu Manatuto, enfrenta falta livru manual no livru alunu, ne’ebé afeta prosesu aprendizajen estudante sira.
Preokupasaun ne’e hato’o husi Koordenadór EBF 1.2 Bora, Rosa Amaral, ba STL liuhusi telefone, kuarta (14/10/2026).
Rosa Amaral esplika katak, Ministériu Edukasaun fornese ona livru ba eskola, maibé livru sira ne’e seidauk sufisiente atu responde ba nesesidade estudante hotu, liuliu iha siklu segundu.
Nia hatete katak, livru manual ba estudante sira iha klase segundu siklu la kompletu, no iha kazu balun estudante hetan livru, maibé estudante seluk la hetan.
“Ami-nia eskola iha klase segundu siklu, livru manual ba kada períodu fahe de’it ida-idak. Livru manual mós seidauk kompletu, no livru alunu balun iha, balun laiha,” nia dehan.
Rosa Amaral mós relata katak, biblioteka eskola nian iha fatin ne’ebé kondisaun la apropriadu, tanba edifísiu nia parte balun nakloke, ne’ebé halo difísil atu rai livru ho di’ak bainhira udan boot.
Iha parte seluk, profesór EBF Bora, Franco Soares, mós konfirma katak eskola enfrenta falta livru manual, liuliu ba estudante klase lima no neen.
Nia hatete katak, livru manual ba matéria Literasia Tetun, Matemátika no disiplina seluk seidauk sufisiente, tanba ne’e profesór sira hasoru difikuldade iha prosesu aprendizajen.
“Durante prosesu aprendizajen, ami uza livru ne’ebé iha, maibé livru alunu menus. Livru manual ba klase lima no neen mak menus liu,” Franco Soares esplika.
Nia akresenta katak, eskola aprezenta ona formuláriu pedidu livru ba Ministériu Edukasaun, maibé livru ne’ebé simu barak liu ba siklu primeiru, enkuantu siklu segundu sei enfrenta falta.
EBF 1.2 Bora iha estudante hamutuk 178 no profesór na’in lima Tanba ne’e, falta livru sai dezafiu ida ba eskola atu asegura prosesu aprendizajen ne’ebé di’ak no efetivu ba estudante sira.
(joa)
