DILI, STLTIMORLESTE.com — Juiz Administradór Tribunál Dili (TJPID), Yudi Pamukas afirma, sei kumpre kompeténsia legál iha jestaun tribunál, enkuantu prosesu reorganizasaun sei iha faze preparasaun.
Yudi Pamukas ko’alia ba jornalista sira iha Tribunál Dili, Kuarta-feira (14/10), no esplika katak nia prioridade mak organiza tribunál no asegura kondisaun di’ak ba juiz sira ne’ebé koloka iha instituisaun ne’e.
“Ha’u-nia knaar mak jere tribunál, la’ós halo buat seluk. Ha’u sei kontinua hala’o knaar tuir kompeténsia ne’ebé lei fó mai ha’u,” Yudi Pamukas afirma.
Nia hateten katak, Lei Organizasaun Judisiária fó kompeténsia ba Juiz Administradór atu reprezenta no jere tribunál, inklui organiza gabinete ba juiz sira.
Kona-ba juiz sira ne’ebé seidauk sai husi fatin, Yudi husu atu kofirma diretamente juiz hirak-ne’e, atu sira bele esplika sira-nia pozisaun kona-ba desizaun ne’ebé foti ona.
Nia esplika katak, nia responsabilidade limita ba juiz sira ne’ebé koloka iha Tribunál Dili. Ba juiz sira ne’ebé la koloka iha tribunál ne’e, nia la tama iha asuntu ne’e.
Yudi mós afirma katak, desizaun atu muda juiz sira tama iha prosesu administrativu, ne’ebé inklui preparasaun no organizasaun gabinete ba juiz sira.
Maski nune’e, nia hateten katak prosesu reorganizasaun seidauk implementa medida konkretu, tanba foin iha faze preparasaun.
Kona-ba eskoltu Prezidente Tribunál Rekursu nian, Yudi esplika katak seguransa bele halo koordenasaun ho administradór atu trata situasaun balu. Maibé, to’o agora, seidauk iha medida konkretu ne’ebé hala’o.
Iha sorin seluk, jurista Sérgio Dias Quintas manifesta preokupasaun kona-ba pozisaun Juiz Administrador, tuir lolos Juiz neebe ho kareira segunda klase maka bele ba tur iha neeba.
Nia konsidera katak, juízes segunda klase bele nomeia atu hala’o knaar hanesan Juiz Administradór, tanba juízes ho kategoria ne’e mós iha kapasidade no kualidade atu hala’o knaar ne’e ho di’ak.
“Juiz segunda klase bele nomeia atu sai Juiz Administradór, tanba juízes ho kategoria ne’e mós iha valor no kapasidade,” dehan Sérgio Dias Quintas.
Nia hatutan katak, knaar Juiz Administradór nian importante tebes, liuliu iha jestaun tribunal no distribuisaun prosesu sira ba juízes.
Nia afirma katak, prosesu hotu ne’ebé tama iha tribunal sei liu hosi mekanizmu distribuisaun, atu garante prosesu sira fahe ba juízes tuir prosedimentu ne’ebé aplika.
(ter)
