DILI, STLTIMORLESTE.com – Eskola Sekundáriu Téknika Vokasionál ba Indústria no Teknólojia (ESTV-IT) 28 de Novembro, Becora, Díli, laiha dadus estudante feto grávida ne’ebé sei tuir ezame nasionál iha tinan 2026.
Diretór ESTV-IT 28 de Novembro, Tomas Pinto, mak hato’o informasaun ne’e ba STL, Segunda-feira (19/10/2026).
Tomas Pinto hatete katak, to’o agora, eskola ne’ebé nia lidera la iha dadus kona-ba estudante feto grávida ne’ebé sei tuir ezame nasionál.
“Ami-nia eskola laiha dadus estudante feto ne’ebé grávida atu tuir ezame nasionál. Karik iha eskola seluk, ami la hatene, maibé iha ami-nia eskola dadus estudante grávida laiha,” nia informa.
Nunee mos,Koordenadór Gabinete Unidade Kurríkulu Nasionál iha ME, João Mau Pelu,dehan,ba ezame nasionál tinan 2026, iha estudante feto balun ne’ebé iha kondisaun grávida. Maibé, to’o agora ME seidauk hetan dadus kompletu kona-ba númeru estudante sira ne’e, tanba munisipiu balun seidauk aprezenta informasaun tomak.
“Tinan ida-ne’e iha kazu espesiál balun, estudante feto balun iha kondisaun grávida. Maibé, to’o agora ita seidauk hetan númeru ezatu, tanba munisipiu balun seidauk fó informasaun kompletu kona-ba estudante sira ne’e,” João Mau Pelu dehan.
Nia esplika katak, ME koordena ona ho diretór eskola no autoridade edukasaun munisipál sira atu identifika estudante feto grávida no prepara sala espesiál ba sira, hodi fasilita sira-nia partisipasaun iha ezame nasionál.
Enkuandu Diretór Eskola Sekundária Nobel da Paz, Jeremias P. de Jesus, hatete katak iha eskola ne’e iha estudante feto grávida na’in tolu ne’ebé prepara an atu tuir ezame nasionál no ezame lokál ba tinan 2026.
Nia esplika katak, estudante feto grávida na’in tolu ne’e transfere mai Eskola Sekundária Nobel da Paz husi eskola seluk, no agora sira hein atu tuir ezame tuir kalendáriu ne’ebé determina ona.
“Iha ne’e ami-nia estudante feto na’in tolu mak iha kondisaun grávida. Sira na’in tolu ne’e prepara an atu tuir ezame nasionál no ezame lokál ba tinan ida-ne’e,” Jeremias P. de Jesus afirma.
(jac)
