DILI, STLTIMORLESTE.com – Servisu Edukasaun Munisipál (SEM) Bobonaro, Manatuto no Lautém kontinua hametin koordenasaun ho Ministériu Edukasaun (ME) atu rezolve dezafiu eskola sira-nian.
Koordenasaun ne’e visa fasilita troka informasaun entre nivel munisipál no nasionál, hodi identifika problema sira ne’ebé eskola hasoru no buka solusaun apropriada.
Diretór Servisu Edukasaun Munisipál Bobonaro, Miguel Freitas, hato’o informasaun ne’e ba STL liuhusi telefone, Segunda-feira (19/10/2026).
“Ami iha liña koordenasaun ho ME nasionál. Bainhira eskola sira hato’o problema, ami transmite ba nivel nasionál atu buka solusaun,” Miguel dehan.
Nia esplika katak, koordenasaun entre SEM no ME importante atu asegura komunikasaun efetiva, liuliu kona-ba difikuldade sira ne’ebé eskola hasoru iha terenu.
Miguel afirma katak, to’o agora, koordenasaun entre SEM Bobonaro no ME iha nivel nasionál kontinua lao di’ak, hodi apoia implementasaun servisu edukasaun.
Iha Manatuto, Diretór Servisu Edukasaun Munisipál, Luis Antonio Soares, hatete katak, koordenasaun ho ME envolve mós superintendente sira atu identifika no relata problema eskola sira-nian.
“Liu husi superintendente sira, ami hato’o relatóriu trimestrál ba ME, atu bele fó atensaun ba difikuldade ne’ebé eskola sira hasoru,” Luis esplika.
Nia hatutan katak, SEM Manatuto la trata de’it asuntu sira tuir nia kompeténsia, maibé mós koordena atividade sira ne’ebé ME hala’o iha munisípiu.
“Iha difikuldade balun ne’ebé ami hasoru, ami sempre informa ba diresaun nasionál iha ME, diretamente ka liuhusi superintendente sira,” nia dehan.
Luis subliña katak, koordenasaun ne’e importante atu fasilita komunikasaun no asegura katak problema eskola sira-nian bele hetan atensaun husi entidade kompetente.
Iha Lautém, Diretór Servisu Edukasaun Munisipál, Anibal Fernandes, mós konfirma katak nia instituisaun kontinua koordena ho ME atu hato’o informasaun kona-ba situasaun eskola sira-nian.
“Ami koordena servisu ho parte nasionál hodi informa malu, liuliu kona-ba eskola sira ne’ebé hasoru difikuldade ruma,” Anibal dehan.
Entretantu, Diretór Nasionál Ensinu Sekundáriu iha ME, Benjamin Gomes da Cruz Fernandes, konfirma katak SEM sira kontinua hato’o informasaun ba nivel nasionál kona-ba dezafiu ne’ebé eskola sira hasoru.
(jac)
