DILI, STLTIMORLESTE.com — Prezidente Tribunál Rekursu (PTR), Afonso Carmona hasoru malu ho Primeiru-Ministru (PM), Kay Rala Xanana Gusmão, iha Palásiu Governu, Dili, Segunda-feira (19/10/2026), atu ko’alia kona-ba asuntu institusionál no koordenasaun entre órgaun soberania Estadu.
Enkontru ne’e dura minutu 45, hahu tuku 09h00 to’o 09h45. Enkontru ne’e sai oportunidade ba parte rua atu aborda asuntu relevante sira kona-ba funsionamentu instituisaun Estadu, tuir kompeténsia no atribuisaun ne’ebé Konstituisaun no lei determina.
Diálogu entre Podér Ezekutivu no Podér Judisiáriu ne’e mosu iha kontestu ne’ebé komunikasaun institusionál presiza hala’o ho respeitu ba prinsípiu separasaun podér no independénsia tribunál sira.
Tuir observasaun jornalista STL iha Palásiu Governu, hafoin enkontru remata, PTR Afonso Carmona la fó esplikasaun kona-ba asuntu prinsipál ne’ebé diskute ho Xefe Governu, maski jornalista nasionál sira husu atu hetan klarifikasaun.
“Imi hasai de’it hau-nia foto, ne’e mós loos ona, no sae kareta ba kedan ninia servisu-fatin,” dehan Afonso Carmona bainhira jornalista sira husu komentáriu.
Maski nune’e, konteúdu detalhadu kona-ba asuntu sira ne’ebé diskute iha enkontru ne’e seidauk hetan esplikasaun públika husi parte rua.
(jos)
