FATUMEA, STLTIMORLESTE.com — FALINTIL-Forsa Defeza Timor-Leste (F-FDTL) liuhusi Komponente Terrestre ne’ebé destaka iha Postu Administrativu Tilomar, Munisípiu Covalima, fó apoiu nesesidade bázika ba família Arista Gusmão, iha Aldeia Traducama, Suku Nanu, Postu Administrativu Fatumea, Munisípiu Covalima.
Tuir informasaun ne’ebé STL asesu iha pájina ofisiál Komponente Terrestre, iha 19 Outubru 2026, apoiu ne’e inklui fós, supermi, mina-te’in no sasan nesesidade bázika seluk tán. Entrega apoiu ne’e akompaña diretamente husi Xefe Suku Nanu, Abel Mendonça.
Apoiu ne’e mai iha tempu ne’ebé família Arista enfrenta difikuldade ekonomia, liuliu atu garante hahán loroloron no sustenta nesesidade alin sira.
Istória moris Arista nian ho alin sira iha laletek Nanu
Iha laletek Suku Nanu, Arista Gusmão lori responsabilidade boot tau-matan ba nia alin sira, maski nia rasik la iha servisu fixu no rendimentu ne’ebé bele garante nesesidade família nian. Dala ruma, hahán la to’o, nia no nia alin sira tenke enfrenta situasaun toba ho kabun mamuk.
Arista no nia alin sira mak oan husi Jacinta Madeira, ne’ebé mate iha tinan 2022, no aman Mario Salan ne’ebé husik hela sira hafoin feen kaben Jacinta Madeira mate.
Bainhira nia inan mate, Arista foin tinan 19. Husi momentu ne’e, nia moris muda, tanba nia tenke tau responsabilidade família nian iha nia leten.
Antes ne’e, Arista iha mehi atu kontinua estudu to’o universidade. Maibé, situasaun família nian obriga Arista tenke husik nia mehi hodi responsabilidade ba nia alin sira.
Atu sustenta família, Arista ho nia alin sira servisu iha to’os, prepara rai, kuda modo no fa’an produtu sira ne’ebé sira konsege hetan. Maibé, rendimentu ne’ebé mai husi atividade ne’e ki’ik tebes.
Tuir Arista nia esplika, husi fa’an modo nia bele hetan de’it rendimentu besik US$ 10 kada fulan. Iha Suku Nanu, foos kilogramu 20 nia folin US$ 12.50, ne’ebé sai kustu importante ba família ne’ebé iha rendimentu limitadu.
Bainhira osan no hahán la to’o, dala ruma Arista tenke buka dalan atu sustenta família, mak liuhusi husu ajuda ba viziñu sira hodi auguenta nesesidade loron balu, maibé dala ruma tenke toba ho kabun mamuk, tanba dignidade.
Maibé iha loron 07 Outubru 2026, Arista hato’o agradese ba jornalista sira ne’ebé partisipa iha viajen reportajen husi Timor-Leste Press Union (TLPU), tanba sira fó mós apoiu hanesan foos, mina-te’in no sasan nesesidade bázika seluk ba Arista no nia alin sira.
Ba Arista, prezensa TLPU la’ós de’it vizita iha ámbitu atividade jornalista, maibé mós oportunidade atu hato’o realidade moris família nian ba públiku no parte relevante sira atu apoiu no responde ba nesesidade família nian.
Mehi edukasaun interrompe tanba limitasaun ekonomia
Arista remata ona estudu sekundáriu iha Serankote no antes nia inan mate, nia iha mehi atu kontinua estudu to’o universidade. Maibé, hafoin nia inan mate, nia tenke foti responsabilidade sustenta família, no tempu barak liu gasta ba servisu to’os no tau-matan ba alin sira.
La’ós Arista de’it mak afetadu maibé nia alin balu la konsege kontinua eskola, tanba Arista rasik la iha kapasidade atu kobre nesesidade hanesan uniformi, lapis, lapizeira kadernu no seluk tán.
Entre nia alin sira ne’ebé antes eskola no depois para, Mak hanesan Ercília Maria antes iha ensinu baziku terseiru siklu setimu anu eskola iha EBC Traducama, Estevanos iha EBF Traducama kuartu anu, no José iha EBF Traducama kintu anu, Javet kintu anu iha EBF Traducama kintu anu, Sanriana idade 04 seidauk eskola, no Dorego idade 19 la eskola tanba kondisaun defisiénsia mental.
Atual nia alin sira ne’ebé eskola mak Lídia iha iha EBF Traducama kintu anu, Norberto iha EBF Traducama terseiru anu, no Lidia EBF Mahein Foho kintu anu tanba sira hetan ona subsidiu husi programa bolsa da mãe.
Situasaun ne’e halo Arista triste, tanba nia hakarak haree nia alin sira hetan oportunidade atu aprende no prepara sira-nia futuru, maibé limitasaun ekonomia família nian sai obstákulu balu tenke para eskola.
(tom)
