DÍLI, STLTIMORLESTE.com – Domin ne’ebé pratika ho loos bele hamenus violénsia, hasai ódiu, hametin dame no harii unidade iha família no sosiedade.
Mensajen ne’e hato’o husi Padre Paulus Maya liuhusi omilia bainhira prezide misa dominikál iha Katedrál Díli, Domingu (25/10/2026).
Padre Paulus esplika katak, bainhira ema komprende no pratika domin ho loos, sei hamenus hahalok infidelidade iha matrimóniu, servisu no responsabilidade sira seluk iha moris loroloron.
“Bainhira domin komprende didi’ak no hala’o ho loos, iha ne’ebá sei laiha tan ambisaun ba pozisaun, ambisaun ba sasán, ka hanoin katak buat hotu-hotu tenke ba hau de’it no di’ak ba hau de’it,” nia dehan.
Nia enfatiza katak, domin la’ós sentimentu de’it, maibé atitude no hahalok di’ak ne’ebé ema hatudu loroloron, liuhusi pasiénsia, laran-di’ak no respeitu ba ema seluk.
“Domin la’ós sentimentu de’it, maibé hahalok di’ak ne’ebé ita hala’o iha ita-nia moris loroloron. Domin mak forsa ida ne’ebé bele transforma violénsia ba dame, inimigu sai belun, no ódiu sai sentimentu perdua nian,” nia afirma.
Padre Paulus mós hateten katak, domin tenke aplika ba ema hotu, la’ós de’it ba família, kolega ka ema ne’ebé ita koñese, maibé mós ba ema estranjeiru no ema seluk ne’ebé iha kultura diferente.
Nia refere ba leitura dahuluk husi Livru Ézodu, ne’ebé fó hanoin kona-ba importánsia atu hatudu domin ba ema estranjeiru no ema seluk ne’ebé ita seidauk koñese.
“Desde nia hamriik iha hau-nia oin, nia mak ema no nia merese atu hetan hau-nia domin,” nia dehan.
Nia mós temi hanorin Jesus nian atu hadomi Na’i Maromak liu buat hotu-hotu no hadomi ema seluk hanesan ita-nia an rasik.
Hanorin ne’e importante atu pratika iha moris loroloron.
Tuir mai, Pe. konvida fiéis sira atu husu Maromak atu forma sira-nia karakter tuir natureza Maromak nian, hodi bele hadomi malu no harii moris ne’ebé nakonu ho dame, haksolok, unidade no harmonia iha família no sosiedade.
(joa)
