DILI, STLTIMORLESTE.com – Falta ai-moruk iha Sentru Saúde sira iha Munisípiu Dili kontinua sai preokupasaun ba pasiente sira, tanba tenke sosa rasik ai-moruk iha apotika privadu, maski mai buka tratamentu gratuita.
Pasiente Fátima Luzia Pereira hateten, nia sente triste tanba lori oan ba konsulta iha Sentru Saúde Formosa, maibé ai-moruk ne’ebé médiku hakerek iha reseita la disponivel.
Nia esplika katak, nia oan sofre moras bainhira atu hasee bee ki’ik, to’o halo susar no tanis. Tanba ne’e, nia lori oan ba konsulta atu hetan tratamentu.
Maibé, depois konsulta, médiku fó reseita no haruka nia atu sosa ai-moruk iha apotika privadu, tanba farmásia Sentru Saúde la iha stok.
“Agora dadaun hau osan la iha atu sosa, maibé hau nia oan presiza tebes. Hau tenke deve ka impresta osan husi ema seluk atu sosa ai-moruk,” dehan nia ba jornalista sira iha Sentru Saude Formoza, Dili, Kuarta (04/10/2026).
Fátima konsidera, situasaun ne’e la satisfatóriu, tanba Sentru Saúde tenke fornese ai-moruk ba pasiente sira ne’ebé mai buka tratamentu.
Nia mos relata katak, nia rasik sofre moras feto-nian, maibé ai-moruk ne’ebé médiku hakerek iha reseita la disponivel, no tenke sosa iha apotika privadu.
Nia husu Ministériu Saúde atu asegura disponibilidade ai-moruk esensiál, inklui paracetamol no ai-moruk seluk, iha Sentru Saúde sira.
Pasiente seluk, Maria Marciana Lemos mos lamenta situasaun hanesan ne’e. Nia ba konsulta tanba sofre isin-katar, maibé médiku fó reseita de’it tanba ai-moruk la disponivel.
Situasaun hanesan ne’e mos akontese iha Sentru Saúde Komoro, ne’ebé pasiente Jorge Bendito Alves no Rosaria de Jesus relata esperiénsia ne’ebé hanesan.
Jorge Bendito Alves hateten katak, nia ba konsulta tanba sofre moras kulit, maibé pesoál saúde informa katak ai-moruk ne’ebé nia presiza la disponivel.
Nia mos sofre ain-moras no dodok durante loron rua, maibé médiku fó reseita atu sosa rasik ai-moruk iha klínika privadu.
“Estadu aloka osan barak ba Saúde atu sosa ai-moruk, maibé bainhira ami mai konsulta, dehan ai-moruk la iha. Ami povu ki’ik la iha kbiit atu sosa.”
Jorge hatutan katak, pasiente sira mai konsulta ho esperansa atu hetan tratamentu no ai-moruk gratuita, maibé ikusmai tenke uza osan rasik atu sosa.
Ai-moruk ne’ebé pesoál saúde haruka nia atu sosa inklui hydrocortisone cream no ai-moruk seluk atu trata moras kulit.
Nia husu Governu, liuhusi Ministériu Saúde, atu tau prioridade ba planeamentu no jestaun distribuisaun ai-moruk, hodi asegura stock iha unidade saúde sira.
Enkuantu ne’e, Rosaria de Jesus mos lamenta tanba médiku haruka nia sosa Miconazole Cream no Hydrocortisone Cream iha klínika privadu, tanba ai-moruk hirak ne’e la disponivel iha Sentru Saúde.
Rosaria relata katak, nia sosa ona ai-moruk ho folin US$ 1,50, maibé ai-moruk ne’e uza durante loron tolu de’it hotu ona.
Nia presiza kontinua uza ai-moruk durante loron 10 tuir reseita médiku nian, maibé tanba osan laiha, nia fila fali ba Sentru Saúde atu buka ai-moruk gratuita.
“Ha’u mai konsulta fali atu bele simu ai-moruk iha Sentru Saúde, maibé mai mos laiha nafatin.”
Jornalista sira koko atu hetan klarifikasaun husi Diretór Sentru Saúde Munisípiu Dili, maibé to’o notísia ne’e hakerek, Diretór seidauk fó komentáriu no informa katak sei halo konfirmasaun ho farmásia Sentru Saúde.
Antes ne’e, Vise-Ministru Saúde, José dos Reis Magno, afirma katak problema sira iha setór saúde sei rezolve ho neneik, tanba labele rezolve hotu iha tempu ida.
(dom)
