DÍLI, STLTIMORLESTE.com – Sentru Juventude Luta Hamutuk ba Futuru Saúde Timor-Leste reabilita pasiente saúde mental 35 iha Likisá, husi ne’ebé 22 rekopera ona.
Sentru Reabilitasaun Saúde Mental, lokaliza iha Suku Uatuboro, Postu Administrativu Loes, Munisípiu Likisá, hahú implementa tinan kotuk.
Prezidente Asosiasaun Juventude Luta Hamutuk ba Futuru Saúde TL, Patrisio dos Santos hatete katak, sentru ne’e agora iha ona esperiénsia servisu durante tinan ida.
Nia esplika katak, husi pasiente na’in 35 ne’ebé sentru simu, ema na’in 22 rekopera ona. Maioria pasiente sira ne’e mane.
Asosiasaun ne’e servisu hamutuk ho Pradet, Auto Care, Ministériu Solidariedade Sosiál no Ministériu Saúde atu fó atendimentu ba pasiente saúde mental.
Sentru ne’e iha kapasidade atu akumula pasiente hamutuk na’in 20. Auto Care mak refere pasiente sira ba sentru atu hetan tratamentu no reabilitasaun.
Atendimentu ne’ebé sentru fornese inklui aimoruk, hahán, hela-fatin no roupa. Maibé, responsabilidade kona-ba aimoruk pasiente nian sei iha Hospital Nasionál Guido Valadares (HNGV).
“Ami kontinua halo akompañamentu ba sira-nia hela-fatin no aimoruk. Bainhira aimoruk hotu, sentru mak ba foti aimoruk atu fó ba sira,” dehan Nia ba STL liu husi telefone, Kuarta (04/11/2026).
.
Nia hatutan katak, sentru kontinua halo akompañamentu ba pasiente sira ne’ebé antes abandona iha estrada no família la tau matan ona.
Atu rezolve problema hela-fatin, asosiasaun koopera ho autoridade lokál no kolega Januario Soares atu konstrui uma ba pasiente sira.
Aleinde ne’e, sentru hetan apoiu husi KPDS liuhusi Ministériu Saúde atu konstrui uma ba pasiente. Vise-Ministru Saúde mós partisipa iha serimónia entrega uma.
Patrisio informa katak, servisu hotu ne’ebé asosiasaun hala’o depende ba voluntáriu sira-nia kontribuisaun.
Asosiasaun mós hetan apoiu husi GAS atu konstrui uma, dapur no mura. Enkuantu Ministériu Solidariedade Sosiál no Inkluzaun (MSSI) fó apoiu foos saku 10 kada fulan.
Maski nune’e, transporte sai dezafiu prinsipál ba sentru, liuliu atu lori pasiente husi Dili ba Likisá.
Patrisio dehan katak, limitasaun transporte la bele hamenus sentru nia komitmentu atu kontinua tau matan ba pasiente saúde mental sira, liuliu ema abandonadu iha área urbana Dili.
Nunee mos Pasiente Esmeralda hatete, nia rekopera hikas husi moras nee depois halo tratamentu iha sentru rehabilitasaun nee, no agora Fila hikas ba familia iha uma Komoro.
Nia katak, durante iha Sentru rehabilitasaun hetan atendementu diak husi pesoal Sira neebe halo servisu iha fatin nee, tanba sempre simu aimoruk husi sira hodi fo hemu ba pasiente sira.
Entertantu Diretór Pradet, Manuel Gonçalves, hatete katak organizasaun ne’e servisu iha área saúde mentál hahú husi 2002 to’o agora.
Nia esplika katak, Pradet fó atensaun ba pasiente sira atu asesu tratamentu médiku no hetan apoiu sosial, hodi responde ba nesesidade bázika loroloron.
Intervensaun ne’e inklui mós pasiente sira ne’ebé sofre trauma no estres, liuhusi servisu hamutuk ho família atu fó apoiu ba individu sira.
“Ita nia prioridade mak ajuda pasiente sira hetan tratamentu médiku no apoiu sosial, inklui intervensaun hamutuk ho família,” dehan nia.
Manuel hateten katak, husi 2002 to’o Agostu 2026, Pradet rejista ona pasiente moras mentál hamutuk 2.097.
Dadus ne’e bazeia ba pasiente sira ne’ebé Pradet identifika no atende iha territóriu, maski seidauk konsege to’o munisípiu no área rurál hotu.
Husi total ne’e, feto mak maioria, ho pasiente sira hahú husi idade joven to’o ema idade avansada.
(dom)
