DÍLI, STLTIMORLESTE.com – Prezidente Konfederasaun Desportu Timor-Leste (CDTL), Afrânio Xavier Amaral husu Governu atu kria polítika no lei espesífika kona-ba saláriu ba treinador desportu sira ne’ebé hetan ona sertifikadu no kontribui ba dezenvolvimentu atleta iha Timor-Leste.
Afrânio Xavier Amaral hateten katak, Governu tenki fó atensaun no dignidade ba treinador sira, liuliu sira ne’ebé hetan ona sertifikadu profisionál no servisu atu prepara atleta sira reprezenta nasaun iha kompetisaun internasionál.
Nia konsidera katak, treinador balu durante sira nia vida tomak dedika an ba atividade treinu, maibé to’o agora seidauk iha sistema saláriu ne’ebé klaru atu fó motivasaun no garantia ba sira nia moris.
“Treinador sira ne’ebé hetan ona sertifikadu, ita tenki define sira nia saláriu. Tanba treinador ida nia saláriu la iha, no situasaun ne’e ladún fó motivasaun ba treinador sira,” Afrânio hateten.
Nia kontinua esplika katak, kuaze treinador ida durante nia vida tomak envolve an iha atividade treinamentu. Tanba ne’e, Governu presiza kria polítika saláriu ba ofisiál treinador sira ne’ebé iha kualifikasaun no dedika sira nia an ba preparasaun atleta.
Afrânio mós husu atu kria lei ida ne’ebé bele garante seguransa no direitu ba atleta no treinador sira, atu sira bele hala’o knaar ho konfiansa bainhira reprezenta Timor-Leste iha atividade desportiva hotu-hotu.
Nia hato’o deklarasaun ne’e ba jornalista STL, iha ETDA, Díli.
(leo)
