DÍLI, STLTIMORLESTE.com – Primeiru-Ministru (PM), Kay Rala Xanana Gusmão apela ba povu Timor-Leste atu mantein unidade no dame hodi simu líder rejionál sira ne’ebé sei vizita Timor Leste iha fulan Novembru.
Primeiru Ministru Kay Rala Xanana hato’o apelu ne’e ba jornalista sira, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pité, Kuarta-feira (04/11/2026).
Iha okaziaun ne’e, Xanana husu sidadaun hotu atu kontinua moris hamutuk iha dame no unidade, liuliu iha momentu mundu hasoru konflitu armadu no manifestasaun oioin.
Tuir ajenda ofisiál Estadu nian, vizita líder rejionál sira sei hahú iha loron 24 Novembru, ho reprezentante Prinsipadu Mónaku, no kontinua ho líder husi Fiji, Vanuatu no Papua-Nova Guiné.
“Ita buka enkoraja malu, fó hanoin ba malu dehan, to’o ona, ita moris ho pás nafatin, dame nafatin,” Primeiru-Ministru Xanana Gusmão dehan.
Nia hatutan katak, vizita líder rejionál sira ne’e sai oportunidade importante atu hametin relasaun diplomátika, promove kooperasaun no haforsa kompromisu hamutuk ba dame no unidade.
Iha loron 29 Outubru 2026, Prezidente Repúblika José Ramos-Horta informa katak líder rejionál husi nasaun lima sei vizita Timor-Leste durante fulan Novembru.
Líder sira ne’e inklui Primeiru-Ministru husi Papua-Nova Guiné, Fiji no Vanuatu. Vizita diplomátika ne’e reprezenta oportunidade atu hametin amizade, parseria no kooperasaun entre Timor-Leste no nasaun sira seluk.
Timor-Leste kontinua hametin relasaun ho nasaun sira iha rejiaun Pasífiku no Sudeste Aziátiku, liuhosi diálogu diplomátiku, kooperasaun bilateral no partisipasaun iha mekanizmu rejionál.
(eme)
