BAUKAU, STLTIMORLESTE.com – Suku Abafala no Uatame neebe pertense ba Postu Administrativu Kelikai Antigu iha Munisipiu Baukau, hakarak retira husi postu refere, tanba distansia.
“Sim, komunidade nafatin rejeita, tanba komunidade besik liu Postu Administrativu Kelikai, hau sente ba fali Kelikai Antigu distansia dook tebes afeta ba komunidade sira atu trata dokumentus ruma,” hateten Xefe Suku Abafala, Agapito dos Reis ba jornalista sira iha Vila Antiga, Sesta (13/12/2024).
Tuir Agapito katak, komunidade Abafala rejeita atu hamutuk ho komunidade husi Suku seluk iha Postu Kelikai Antigu, tanba distansia husi Suku Abafala ba Postu refere distansia dook inklui akur mota, neebe iha tempu udan difikulta komunidade sira trata dokumentus, nunee hakarak nafatin ho Postu Kelikai, tanba distansia besik.
Suku Abafala rasik iha populasaun hamutuk 1.442 neebe iha fulan hirak ba kotuk liu husi estrutura Suku hatoo ona preokupasaun liu husi karta informal ba Governu atu haree asuntu rejeita atu inklui iha Postu Kelikai Antigu, maibe too ohin loron seidauk iha solusaun.
“Hau hanoin Governu labele utiliza sistema obrigatoriu ba komunidade Abafala, tanba nee hatoo ba Ministeiru Administrasaun hodi konsidera netik ezijensia komunidade nian,” nia sujere.
Tuir Agapito katak, prosesu estabelese Postu Kelikai Antigu nee kompetensia Governu nian ho sistema obrigatoriu, tanba nee husu Ministeriu Administrasaun Estatal prezisa konsidera komunidade Abafala nia preokupasaun ba Postu refere.
Nunee mos Xefe Uaitame, Cesaltino Freitas Pereira sublina, populasaun Uaitame hamutuk 2.340 antes nee ezije ona lakohi atu hamutuk ho Postu Kelikai, neebe hatoo ona ba Ministeiru Estatal hodi haree asuntu refere, tanba distansia dook, maibe ba Kelikai besik, nunee mantein ho Postu Kelikai.
“Sira uza obrigatoriu foti povu nia direitu tenke ba Postu Antigu, mais hau nuudar Autoridade Lokal hau sei la aseita, inklui komunidade mos lakohi ba Kelikai Antigu,” hateten Celestino.
Hatan ba kestaun nee, Ministru Administrasaun Estatal, Tomas do Rasario Cabral hateten, nee diploma anterior nunee implementasaun lao nafatin hamutuk iha Postu Kelikai Antigu, tanba nee estabelese husi Governu anterior.
“Hau koalia tiha ona ho Xefe Suku sira kria pas no estabilidade iha rai ida nee no asegura situasaun neebe Administrasaun halo hela, Autoridade Munisipal iha obrigasaun atu halo mudansa, tanba Autoridade Munisipal reprezentante Governu sentral iha Munisipiu,” Tomas hateten
Enkuantu nota informasaun neebe STL asesu katak, iha loron 26 Julhu 2022, Autoridade Suku nain 5 husi Suku Afaça, Namanei, Guruça, Uaitame inklui Abafala esforsu hamutuk halo audensia ho estrutura Ministeriu Administrasaun Estatal (MAE) iha tempu VIII Governu Konstitusional, neebe kompostu husi Ministru Administrasaun Estatal, Diretor Jeral Dezentralizasaun Administrativu, no Diretor Nasional Administrasaun Lokal atu reativa hikas Postu Kelikai antigu.
Nunee, iha loron 23 Novembru 2022, Governu liu husi Ministeriu Administrasaun Estatal aprezenta iha sorumutuk Konselhu Ministrus tempu VIII Governu Konstitusional nian, ba inisiativa alterasaun daruak Lei nu. 11/2009, loron 7 Outubru, Divizaun Administrativa Territoriu. Ho intervensaun lejizlativa hakarak fahe Postu Administrativu Kelikai ba tolu, mak hanesan Kelikai, Kelikai Antigu no Matebian, neebe hetan dezisaun final liu husi Sorumutuk Konselhu Ministru iha loron 15 Marsu 2023.
Desizaun final ba Alterasaun daruak nee deklara katak, Postu Administrativu Kelikai atual okupa area luan besik 13,7%, Suku 15 ho total populasaun besik 17.471 iha Munisipiu Baukau, nunee fahe ba Postu 3 mak hanesan, Postu Kelikai atual hela ho area 46km² no Suku 5, mak hanesan Suku Baguia, Letemumu, Lakuliu, Makalaku no Bualale ho populasaun hamutuk 7.096.
Kelikai Antigu hela ho area 80km², kompostu husi suku 5 mak hanesan Suku Afaça, Abafala, Guruça, Namanei no Uaitame ho total populasaun 5.998, nunee mos Postu Matebian iha Suku 5 mak hanesan Suku Laisorulai de Baixo, Laisorulai de Cima, Maluru, Abo no Lelalai ho nia area luan 80km² husi populasaun hamutuk 4.300.
Bazeia ba ezijensia husi komunidade Suku 5 neebe liu husi nia Autoridade Suku, antes nee aprezenta ba Governu no hetan aprovasaun hodi publika iha Jornal Republika, mak iha loron 15 Junhu 2023, VIII Governu Konstitusional liu husi Visi Ministru Administrasaun Estatal, Lino Torezaun hamutuk ho Prezidente Autoridade Munisipiu Baukau sesante ho nia estrututa lansa fatuk dahuluk ba konstrusaun edifisiu Postu Administrativu Kelikai Antigu iha Suku Afaça, neebe hetan partisipasaun husi komunidade no Autoridade Suku 5 nian, hanesan Suku Afaça, Abafala, Gurusa, Namanei no Uaitame, maibe ikus komunidade Abafala tomak rejeita, ho razaun distansia dook no akur mota.
(EST 2)
