DILI, STLTIMORLESTE.com – Prezidente Republika (PR), Jose Ramos Horta aban Kuarta halao abertura seminariu Internasional, ho topiku “Direitu Ekonomiku Sosial no Kultura” neebe organiza husi PDHJ.
Kestaun nee hatoo husi Provedor PDHJ, Virgilio da Silva Guterres Lamuka ba jornalista sira, bainhira remata enkontru ho Prezidente Republika iha Palasiu Prezidensial, Nicolau Lobato Bairo Pite, Dili, Tersa (19/11/2024).
Nia dehan, ohin mai hasoru Prezidente Republika bazeia ba sira nia pedidu, atu halo audensia neebe sira hatama ona, lo-loos semana hira liu ba, maibe tanba Prezidente laiha fatin, tanba nee ohin mak mai hasoru.
“Objetivu prinsipal mak atu konvida Prezidente atu halo abertura ba seminariu internasional neebe mak Senaf halo, tanba Senaf imi hotu hatene saunsistezia forum ba national institutu forum Morais ASEAN nian, neebe tinan 2024 PDHJ mak lidera hahu horiseik ohin halo hela enkontru anual iha Hotel Novu Turizmu, aban taka ho seminariu Internasional ho topiku “Direitu Ekonomiku Sosial Kultural Iha Area Fronteira,” katak nia.
Nia hatutan, seminariu internasional nee PDHJ sei konvida orador sira neebe mak parseria ho PDHJ rasik hodi fahe sira nia esperiensia.
Iha biban nee, Prezidente Republika, Jose Ramos Horta konfirma katak, aban dader sei ba partisipa seminariu nee hodi halo abertura ba seminariu internasional ho topiku Direitu Ekonomiku Sosial no Kultura neebe organiza husi PDHJ.
(eme)
