DILI, STLTIMORLESTE.com – Komisaun Organizadora ba Jogu Desportu Comunidades dos Países de Língua Portuguesa (CPLP) ofisiálmente muda orariu abertura neebe antes nee dehan ba tuku 16:00, maibe agora muda ba 18:00 OTL.
Nia dehan, razaun iha mudansa oras tanba ekipa selesaun balun sei tarde, tanba nee tenke muda oras jogu iha 18:00 OTL foin hahu abertura jogu.
“Ita muda oras tanba delegasaun balun sei too tarde, ami buka solusaun melhor atu halo abertura nee ho prezensa kompletu,” hatete Ministru Juventude, Desportu, Arte no Kultura (MJDAK), Nélio Isaac Sarmento ba jornalista sira liu husi konferensia imprensa iha salaun CCD, Sabadu (19/07/2025).
Nia esplika, iha Jogu CPLP nee nasaun haat mak seidauk iha konfirmasaun atu partisipa iha jogu nee.
“Ita hatene katak, Brasil, Guinea Equatorial no Guinea Bissau ate agora seidauk iha informasaun ofisiál balun husi sira mai komisaun organizadora,”nia informa.
Governante nee mos husu ba públiku atu mai sedu iha ba Estadiu Munisípal Dili, tanba kapasidade Estadiu limitadu.
“Komisaun haree ona katak estadiu nakonu ona no ema labele tur ona mak odamatan hotu ami sei taka, atu asesu ami tau hela layar boot ida iha neeba para hotu-hotu bele akompanha transmisaun,” nia afirma.
(jen)
