BAUKAU, STLTIMORLESTE.com – Fulan Abril 2025, Autoridade Protesaun Sivil (APC – sigla português) sei distribui material rekuperasaun ba vitima dezastre naturais neebe uma hela fatin hetan estraga.
“Material rekuperasaun hau aprova ona, inisiu Abril nee ami distribui ona, dadus mak hau la lori, maibe prontu ona, hau aprova tiha ona, prontu atu distribui,” hateten Prezidente APC, Jesuino dos Reis de Matos Carvalho ba jornalista sira iha Vila Nova, Kinta (27/03/2025).
Jesuino katak, distribui material rekuperasaun sei akontese primeira semana fulan Abril, tanba daudaun ekipa halo ona re-verifikasaun ba dadus vitima sira nian neebe rejistu iha tinan 2024 no 2025 nee.
Maibe kona-ba fiziku material rekuperasaun kada vitima dezastre naturais sei simu la hanesan inklui mos osan badaen nian, tanba antes nee ekipa sira iha kada munisipiu remata uma hetan estragus ho kategoria natoon, aat kmaan no hetan estragus total.
“Mao de obra nee sempre iha, kuandu fo ba komunidade rekuperasaun tau osan para selu badaen, tanba hau aprova ona foin daudaun nee rihun US$ 300 resin akompanha kedas ho material rekuperasaun,” Jesuino akresenta.
Tuir informasaun neebe iha, material rekuperasaun neebe atu distribui ba benefisiariu vitima dezastre naturais sira iha kategoriu tolu mak hanesan uma neebe hetan estragus total sei hetan material konstrusaun no osan US$ 1.000, estragus natoon hetan materiial konstrusaun ho osan US$ 750 no uma estragus kmaan sei hetan material konstrusaun inklui osan US$ 600.
(tom)
