DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial ADA, tanba lori tudik tenta sona lezadu ho inisial MMSG.
Tuir akuzasaun neebe iha katak, iha loron 31 fulan Marsu 22, pur volta 11h:30, MMSG hamutuk ho testemunha MI ba iha Komoro hodi hatoo lia rekadu ba familia sira.
Banhira hatoo hotu lia rekadu arguidu no testemunha fila mai atu sae kareta iha Estrada, maibe arguidu kaer hela tudik ida ho medida 32 cm hodi sona lezadu, maibe lezadu ses tiha.
Arguidu kontinua lori tudik sona nafatin lezadu, tanba nee lezadu mos tahan ho liman hodi tudik kona iha liman laran parte karuk hetan kanek, hodi ba suku pontu hitu iha sentru Saude Dom Alexo.
Arguidu halo asaun hasoru lezadu, tanba deskonfia lezadu amante ho arguidu nia feen. Konsekunesia husi aktu nee halo lezadu sente moras iha fatin atinjidu no mos trauma.
Tanba nee Ministeriu Publiku akuza arguidu hanesan autor material ba Krimi Ofensa Integridade Fizika Simples neebe previstu iha artigu 145 husi Kodigu Penal, no lei Arma Branka numeru 5/2017.
Hatan ba akuzasaun neebe iha, arguidu deklara katak, antes nee arguidu ho lezadu iha ona problema, tanba lezadu amante ho arguidu nian feen, maibe momentu neeba rezolve tiha. Maibe ikus mai arguidu kontinua haree lezadu tula arguidu nia feen, tanba nee mak momentu neeba ho emosaun arguidu lori tudik ida maibe la intensaun atu sona lezadu maibe arguidu liki mak kona lezadu nia liman.
Arguidu mos deklara, oras nee daudaun arguidu ho MI separa ona, arguidu mak hela hamutuk ho sira nia oan nain lima, hodi tau matan ba sira.
Iha sala julgamentu laran lezadu deklara katak, lezadu ho sasin MI neebe hanesan arguidu nia feen moris hamutuk.
Lezadu deklara, momentu akontesimentu nee MI mak telefone ba lezadu atu tula MI hodi ba kasu lia iha Komoro, tanba nee lezadu mos ba tula MI, maibe iha dalan arguidu haree ona lezadu ho MI. Tanba nee mak lezadu ho MI kasu lia hotu atu fila, arguida mosu ba lori tudik ida sona lezadu, tanba nee mak lezadu tahan netik hodi kona fali lezadu nia liman.
Rona tiha deklarasaun husi arguidu no lezadu, Tribunal husu ba iha Prokurador atu tama ba iha alegasaun.
Iha alegasaun nee, Prokurador Renato Bere Nahak deklara katak, arguidu konfesa ba faktus no reforsa tan husi lezadu katak, momentu neeba arguidu kaer duni tudik ida sona lezadu, no lezadu tahan netik hodi ikus mai tudik kona fali lezadu nia liman. Tanba nee MP mantein ho krimi Ofensa Integridade Fizika Simples no krimi Arma Branka, hodi solisita ba iha Tribunal koletivu atu kondena arguidu ho pena prizaun tinan 3.
Enkuantu Advogadu Privadu, Octavio Cardozo deklara katak, aktu neebe arguidu halo laos ho planu maibe ho espontania. Tanba nee defeza husu ba iha Tribunal atu aplika pena suspensaun ba arguida.
Rona tiha alegasaun nee, Tribunal adia ba loron seluk hodi rona desizaun.
Audensia julgamentu nee, prezide husi Juiz Koletivu, Zulmira Auxiladora, Ivan Patrocenio no Arjentino Nunes, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Advogadu Privadu, Olivio Cardozo.
(ter)
