DILI, STLTIMORLESTE.com – Formadus Advogadu Privadu nain 29 neebe termina ona sira nia faze teoria iha Sentru Formasaun Juridiku no Judisiariu (SFJJ), oras nee daudaun halao hela faze estajiu iha eskritoriu advogadu sira iha Timor laran.
“Advogadu Privadu sira hamutuk 29 sira mos termina ona sira nia formasaun teoria iha loron 31 fulan Maiu, agora sira halao hela estajiu iha eskritoriu Advogadu sira nian iha Timor laran, no mos Defensor Publiku iha Ermera Baucau Maliana, “dehan Diretora Sentru Formasaun Juridiku no Judisiariu, Marcelina Tilman da Silva ba STL iha Kaikoli, Dili, Kinta (21/08/2025).
Nia hatutan, sira sei halao estajiu durante fulan 9, depois fila fali mai iha Sentru Formasaun hodi halo ezame ba iha agregasaun final. No liu husi ezame nee maka foin haree, formadu nee aptu atu sai Advogadu ka lae.
Maibe rezultadu husi Sentru formasaun ba iha faze teoria nian iha nain 22 maka liu no iha nain 7 la liu, tanba nee sira halo fali rekursu ba iha Visi Ministru Justisa, no ikus mai autoriza no fo tan oportunidade ba sira tama iha faze estajiu, depois iha rezultadu ikus maka avalia fali.
Tanba durante estajiu Sentru Formasaun kontinua akompanha sira hanesan halo kontaktu bebeik ba sira nia orientador, no iha Eskritoriu Advogadu iha orientador ida maka sei orienta sira durante iha faze estajiu, no difikuldade ruma sira hasoru iha faze estajiu sira ba iha Sentru formasaun hodi halo konfirmasaun ho formador sira.
Iha fatin ketak, Jurista Jose Maria Guterres dehan, knaar Advogadu nian importante tebes, atu haree ba iha kazu sira neebe lori ba iha Tribunal.
“Knaar nee importante tebes atu fo asistensia ba ema sira neebe hasoru problema, tanba nee presiza mos aumenta numeru Advogadu nian,” dehan nia.
(ter)
