BAUKAU, STLTIMORLESTE.com – Asian Development Bank (ADB) ho United Nations Development Programme (UNDP) lansa dialogu area negosiu nian ho joven sira iha Munisipiu Baukau.
Deklarasaun nee hatoo husi Reprezentante Rezidente Katyna Argueta ba jornalista sira hafoin aberta dialogu ho emprezariu kiik sira iha salaun apuramentu Baukau, Tersa (22/10/2024).
“Ohin iha Baukau atu halo empoderamentu ba joven sira iha Baukau atu troka ideia ho joven sira neebe halo ona negosiu nomos joven sira neebe foin atu hahu negosiu,” nia dehan.
Nia sublina, dialogu refere liga liu ba area negosiu kiik nian ho kualker negosiu neebe joven sira hahu ona no balun foin planeia atu hahu.
Reprezentativa Rezidente UNDP nee fundamenta, dialogu refere laos parte UNDP no ADB atu fo apoiu finanseiru ba joven sira halo negosiu, maibe atu identifika problema sira neebe durante enfrenta iha negosiu, tanba maioria halo ona negosiu tinan barak, maibe laiha mudansa, tanba impaktu seluk mos husi merkadu.
Iha fatin hanesan, Country Director Timor Leste Resident Mission ADB, Stefania Dina akresenta, eventu dialogu refere atu promove inovasaun, reziliensia no espiritu emprezarial iha foinsae sira nia leet hodi halo movimentu ida ba futuru neebe nabilan iha TL.
“Halo diferensia, nuudar emprezariu foinsae iha kbiit atu lori mudansa iha TL, negosiu bele kria kampu trabalhu, bele estimula kreximentu ekonomiku kontribui ba dezenvolvimentu sosial, negosiu laos buka deit susesu pesoal nian, maibe hadia mos komunidade sai diak liu tan,” nia rekomenda.
Stefania enkoraja joven sira tenke ho aten barani foti dezisaun hodi halo diferensia no fo impaktu pozitivu ba komunidade sira, liu husi ho negosiu kiik sira neebe bele fo rendimentu ekonomia.
(EST 2)
