BAUKAU, STLTIMORLESTE.com – Iha ambitu jogu futebol final ba taxa 28 Novembru neebe realiza iha Suku Vemasi, Postu Administrativu Vemasi, rezulta ema nain 2 hetan kanek iha rentos, tanba tuda.
“Ami vemasi iha joga mak nain rua mane ida ho feto ida hetan kanek, mane nee jogador husi klube Golgota nian ida feto nee adeptus, sira nee kanek iha rentos,” hateten Xefe Sentru Saude Vemasi, Helena Soares ba STL iha Vemasi, Sabadu (24/01/2026).
Nia informa, jogador neebe hetan kanek iha rentos too iha Sentru Saude Vemasi ho kondisaun ran, maibe pesoal saude sira halo kedas atendimentu no suku pontu 2 no adeptus feto refere hetan suku pontu 3 iha rentos.
Nia sublina, pasiente nain 2 refere parte Sentru Saude Vemasi fo ona alta, tanba konsidera kondisaun kanek kaman.
“Feto adeptu nee naran Injania da Costa idade 21 mane jogador nee naran José da Costa 45, sira nain rua too iha nee tau hotu soru, suku hotu, maibe haruka ona ba uma,” Helana informa.
Tuir akontesimentu neebe STL asesu iha terenu, akontese nee iha loron 24 Janeiru 2026 purvorta tuku 16:00 lokraik bainhira ekipa futubol Ostico Fc kontra ekipa Golgota Fc hadau hela primeiru lugar ba kompetisaun jogu refere, iha neebe jogu parte dahuluk seidauk termina ekipa Golgota Fc fo golu ida ba ekipa Ostico FC.
Hafoin ekipa Golgota Fc marka tiha golu refere jogu kontinua lao, maibe mosu deskuidu entre jogadores husi ekipa 2 no arbitrajen deside fo kartaun kinur ba jogador ida husi ekipa Ostico Fc, nunee ofisial husi Ostico Fc halai tama kampu laran hodi diskute malu ho arbitrajem no arbitrajem hasai tan kartaun mean.
Husi nee komesa mosu haklalar husi adeptus sira no kontinua halai tama ba kampu laran too ikus mosu tuda malu, maibe iha jogu refere prezensa mos Polisia Eskuadra Postu Vemasi nunee tiru sae pistola dala tolu hodi hakalma situasaun refere.
Hafoin tiha nee, komisaun organizadora ba jogu refere bolu ofisial ba ekipa 2 refere hodi koalia ba malu no ikus mai ekipa Ostico FC lakohi kontinua jogu refere hodi entrega primeiru lugar ba ekipa Golgota FC.
Nunee komisaun organizadora deside atu fahe premiu ba ekipa sira, maibe la kleur mosu tan fali asaun tuda malu rezulta jogadores ida hetan kanek iha parte rentos no monu kedas iha kampu laran.
Husi nee nia maluk sira halai ajuda hiit vitima refere ba Sentru Saude Vemasi no parte polisia mos konsege kaptura jovem ida ba asaun tuda kanek jogador refere.
No observasaun seluk STL hetan iha resintu Sentru Saude Vemasi iha jovem feto ida mos hetan kanek iha parte rentos neebe, tuir informasaun neebe iha katak husi asaun tuda malu iha kampu laran.
Too notisia nee publika STL seidauk halo konfirmasaun ho parte Autoridade Postu no Suku iha Vemasi, tanba okupadu.
(tom)
One Response
Yes