DILI, STLTIMORLESTE.com – Timor Leste atu adere ba ASEAN, laos lori deit Bandeira ba hatidin, maibe presiza mos promove produtu rai laran iha internasional, nunee halo kompetisaun.
Tuir Deputadu husi Bankada FRETILIN, Antoninho Sarmento katak, Timor Leste atu adere ba ASEAN 2025, importante preparasaun masimu, buat neebe importante mos tenke redus importasaun, nunee promove produtu rai laran.
“Ida nee fila ba kapasidade Governu, se ita atu adere ba ASEAN kria kondisaun, nunee ita bele halo kompetisaun, tanba adezaun ba ASEAN nee laos lori deit Bandeira ida ba tidin loos ona, maibe laos ida nee mak sai indikador, buat neebe sai indikador mak Governu tenke hasae produsaun rai liur laran, hadia ekonomia rai laran, oinsa promove produtu sira ba liur, no kria kondisaun sira tuir kriteria neebe iha, nunee ita bele iha kompetisaun iha nivel internasional”, katak Deputadu Antoninho ba STL, iha PN, Dili, Tersa (05/11/2024).
Nia dehan, buat sira nee hotu recai ba kapasidade Governu, tatika no estratejia Governu oinsa mak atu dezenvolve ekonomia diak liu ba kestaun pozitivu no dinamiku, bainhira adere ba ASEAN.
Nunee mos, Visi Bankada CNRT, Patrocino Fernandes katak, pratikamente kria kondisaun ka preparasaun sira nee husi Governu mak halo.
“Tuir ami nia observasaun agora iha hela faze preparasaun nia laran, nunee partisipa iha reuniaun barak, husi parte ekipa tekniku sira iha Timor Leste no mos husi ASEAN nian,” hatete Patrocino.
Nia dehan, haree husi parte Ministériu Negosisu Estranjeirus mos daudaun nee preparasaun makaas hela, entermus de parte kuadru legais sira hanesan PN mos ratifika akordu konsensaun barak neebe ligasaun ho atu adere ba ASEAN, hanesan mos rekezitus ida.
(gui)
