DILI, STLTIMORLESTE.com – Sekretariu Estadu Igualidade (SEI), Elvina Sousa Carvalho hatete, formalmente Timor Leste (TL) nia adezaun ba iha ASEAN bele fo mos oportunidade neebe mak boot liu ba TL atu dezenvolve aan no mos ba feto maluk sira.
Liafuan nee hatoo husi Sekretariu Estadu Igualidade (SEI), Elvina Sousa Carvalho ba jornalista sira iha Otel Novo Turizmu Lesidere, Tersa (30/09/2025).
“Atu hatete deit, SEI hanoin katak ita nia adezaun formalmente ba ASEAN sei bele mos fo oportunidade neebe mak boot liu ba TL hodi dezenvolve nia aan no mos ba feto maluk sira,” katak Elvina.
Nia afirma, durante nee SEI partisipa iha Forum ASEAN sira, ita mos presiza katak wainhira tama ona ba membru ASEAN iha komitmentu rejional ASEAN sira nia, ba iha alkansu promosaun igualidade iha rejional.
Nia fundamenta, iha avansu lubuk ida, liu-liu ba iha partisipasaun ba vida politika nian no mos iha setor sira seluk hakbiit aan ba hodi tama ba ASEAN.
“Hau hatete deit katak, ita iha komitmentu ba ida nee kompara mos ho nasaun sira seluk membru ASEAN nian, hau hanoin husu ba feto maluk sira hakbiit aan atu tama ba iha ASEAN,” nia hakotu.
Jornalista: EST 1
Editor: Xisto Mendonça
