DILI, STLTIMORLESTE.com – Bankada Kongresu Nasional Rekonstrusaun Timor (CNRT) deklara adezaun ba ASEAN hanesan oportunidade ida ba Timor Leste (TL), oinsa atu envolve iha organizasaun oin-oin iha mundu, maske sei hasoru dezafius hela.
Xefe Bankada CNRT, Patrocinio Fernandes hateten, moris iha mundu global ida agora TL presiza loke konvivensia ho nasaun hotu, nunee bele ajusta TL nia aan tuir mundu ohin loron nian.
Tuir nia, maske hasoru dezafius oin-oin maibe presiza adere ba organizasaun sira mundu nee, nunee bele hatur TL nia pozisaun iha organizasaun internasional sira.
“Ita tenke hateke adezaun ba ASEAN nee hanesan oportunidade, mezmu nia (ASEAN) iha dezafius ba ita, maibe estadu iha responsabilidade atu kria kondisoens, nunee sidadaun sira bele aproveita kondisoens sira nee hodi kompete mos,” hatete Patrocínio ba jornalista sira, iha sala Bankada CNRT, Tersa (04/11/2025).
Nia hatutan, lo-loos nee ba Timoroan hanesan orgulhu boot ida, tanba konsege adere ba ASEAN, mezmu iha ema seluk nia matan nee hatete katak, Timor nee nasaun kiik koan maibe bele konsege hatur nia aan hamutuk ho nasaun sira neebe mak ukun aan iha tinan hirak liu ba kotuk.
“Ohin loron Timor Leste konsege hamriik ho organizasaun sira hanesan ASEAN no Komunidade Pais Lingua Portugeza (CPLP), tur hamutuk atu deskuti no fo hanoin kona-ba situasaun iha sudeste aziatiku iha area politiku, ekonomia no buat seluk tan,” dehan nia.
Nia reforsa liu tan kona-ba dezafius sira neebe iha, Governu tenke esforsu oin-oin hodi kria kondisoens sira, nunee Timoroan hotu bele aproveita adezaun nee nian.
“Estadu Timor Leste iha obrigasaun atu kria kondisoens hotu-hotu para ita bele aproveita, maibe se ita hotu-hotu hateke ida nee ho hanoin pesimista sira katak ita labele tama iha neeba, tanba ita nia kondisaun hanesan nee, maibe ba hau ida nee hanesan pasu ida neebe mak importante tebes,” hatete Patrocínio.
Entretantu molok nee iha loron 26 Outubru 2025 liu husi simeira 47 neebe realiza iha Kuala Lumpur Malazia, Primeiru Ministru Malazia, Anwar Ibrahim ofisialmente anunsia Timor Leste sai ona membru membru ASEAN ba11.
Jornalista: Alberto Menezes
Editora: Carme Ximenes
