DILI, STLTIMORLESTE.com – Adidu Edukasaun no Kultura iha Embaixada Republika Indonézia (KBRI) Dili, Prof. Dr. Ikhfan Haris, M. Sc, halo vizita ba Lionel Training Center (LTC) iha Aldeia Lari, Suku Afaloikai, Postu Administrativu Uatulari, Munisipiu Vikeke.
“Vizita ida nee hanesan resposta ba konvite husi Lionel Training Center (LTC) hodi halo revizaun ba fasilidade formasaun neebé fornese ba komunidade lokál, liu-liu ba foinsae no labarik sira neebé hakarak hasae sira-nia koñesimentu kona-ba komputadór no lian Inglés,” dehan Adidu Edukasaun no Kultura KBRI Dili, Ikhfan Haris ba STL iha Dili, Kinta (12/12/2024).
Nia dehan, programa formasaun ida nee laos deit atu hasae sira nia abilidade iha komputador no Ingles, maibe mos atu hadook sira husi buat sira neebe ikus mai bele fo impaktu negativu ba sira nia kontinuidade iha futuru.
Tuir nia, bainira nia to’o iha foho Babulo nia tutun iha mota Bebui 59 nia sorin, nia haree esperansa (HOPE) no antusiasmu (SPIRIT ) katak, iha neebé deit iha kondisaun saida deit mak labele limita an atu aprende.
Nia promete atu fó bolsa estudu ba estudante, profesór no labarik sira iha Suku Afoloikai sai hanesan ninia prioridade prinsipál hafoin haree oinsá entuziasmu husi sira nia estuda hamutuk iha Lionel Training Center.
Iha vizita nee mós, Adidu Edukasaun no Kultura, Ikhfan Haris halao diskusaun ho autoridade lokal no partisipante treinamentu sira no sira hatete vizita nee nuudar vizita istóriku ida ba sira, tanba to’o oras nee laiha instituisaun ka ONG ida mak vizita sira, ho razaun distánsia neebé mak dook no kondisaun estrada neebé ladiak, nunee susar tebes atu asesu.
Sira mos hatutan liu tan katak, sira nia oan no komunidade presiza aprende mos lian Indonezia atu nunee wainhira iha teste atu kontinua ou bolsa estudu ruma husi universidade Indonezia sira nia oan no komunidade neebe mak intrese bele partisipa hotu e wainhira ba estuda iha Indonezia karik sira hatene ona lian Indonezia, atu nunee labele difikulta sira.
Sira mos husu ba Adidu Edukasaun no Kultura Embaixada Indonézia nian atu bele fasilita hela professor/a Bahasa Indoneisa nian ida ba sira.
Vizita nee nuudar aplikasaun ida husi kompromisu Governu Indonézia nian atu partisipa iha dezenvolvimentu rekursu umanu iha Timor-Leste.
Adidu Edukasaun no Kultura nee mos hatete, rekursu umanu mak sai hanesan xave importante ba nasaun ida nia susesu, tanba nee nia husu atu partisipante formasaun no profesór sira atu aproveita didiak oportunidade sira kona-ba bolsu estudu nian neebé mak oferese husi Instituisaun Ensinu Superiór sira husi Indonézia nian hodi kompete ho Timor oan sira neebe mai husi fatin seluk inklui Dili.
Iha biban nee, Adidu Edukasaun no Kultura Embaixada Indonézia nian mos mós fahe livru mata dalan hanorin Bahasa Indonesia Ba Penutur Asing (BIPA) atu nunee bele fasilita professor/a lian Indonesia hodi bele hanorin no halo mos abertura ba klase formasaun foun iha Lionel Training Center, klase Arte no kultura.
Nia mos la haluha fó apresiasaun ba fundadór Lionel Training Center, Adelino Fernandes, maski nia serbisu ona, maibe nunka haluha kona-ba nia knua moris fatin. Ida nee hanesan buat ida neebé sai anomalia iha tempu ida hanesan agora nee.
Molok atu fila ba Dili, Ikhfan Haris la haluha konvida estudante sira neebé remata ona eskola Sekundária atu mai iha Edifísiu Sentru Kultura Indonézia (PBI) Dili hodi tuir teste bolsa estudu ba kandidatu estudante universitariu foun sira, iha loron 11 no 12 Dezembru 2024 no depois iha 17-20 Dezembru 2024.
(mik)
