BAUKAU, STLTIMORLESTE.com – Administrasaun Postu Administrativu Kelikai Antigu daudaun nee menus fasilidade servisu hodi atende komunidade sira.
Administrador Postu Kelikai Antigu, Francisco Matias Gusmão “Junior” hateten, estabelesimentu Postu Kelikai Antigu no Postu Matebian nuudar Postu foun iha Munisipiu Baukau, maibe daudaun Servisu Administrasaun Postu Kelikai Antigu enfrenta problema, tanba menus fasilidade servisu.
“Husi Administrasaun ida nee hanesan ita hotu hatene, nee Administrasaun foun, liu liu servisu Administrasaun ita falta komputador, meza kadeira inklui transporte operasionalizasaun Postu Administrativu,” hateten Junior ba jornalista sira iha Kelikai Antigu, Sesta (27/05/2025).
Nia sublina, difikuldade neebe daudaun Administrasaun Postu Kelikai Antigu enfrenta nee laos obstaklu atu hamate servisu Administrasaun Postu nian, maibe kontinua utiliza meius oin-oin garante funsionamentu Servisu Administrasaun iha nivel postu.
Nia fundamenta, preokupasaun refere parte Autoridade Postu sei elabora proposta ba parte relevante sira iha Nasional no Munisipal hodi responde.
“Ita sei haruka pedidu para bele haree no fo sasan sira para ita halo atendimentu ba ita nia povu iha Kelikai Antigu,” Junior katak.
Hatan ba kestaun nee, Diretor Jeral Dezentralizasaun Administrasaun Lokal, António A. Guterres hateten, kestaun nee presiza Autoridade Munisipal anota, tanba Autoridade Munisipal nuudar reprezentante Governu Sentral iha Munisipiu atu atende asuntu sira hanesan nee.
“La iha kareta ba Administrador nee kabe ba Prezidente Autoridade nia funsionamentu iha rejime Administrativu neebe aumenta ida nee, aumenta responsabilidade ba Autoridade Baukau, mas hau fiar sei responde tuir nesesidade,” hateten António.
Diretor Jeral nee katak, bainhira preokupasaun kona-ba fasilidade sira iha Administrasaun Postu Kelikai Antigu hetan ona resposta, jestor Postu Administrativu mak tenke utiliza ho kuida, nunee bele uza ba tinan naruk.
Entretantu Postu Administrativu Kelikai Antigu antes nee rejistu Suku lima hanesan Suku Afasa, Namanei, Gurusa, Uaitame no Abafala ho total populasaun rihun 15 resin, maibe Suku rua hanesan Abafala no Uaitame iha faze tranzitoria.
(tom)
