DILI, STLTIMORLESTE.com – Ativista Empoderamentu ba Feto (AEBF) relata sira nia planu atu kapasita feto iha negosiu ba iha Prezidente Republika Jose Ramos Horta.
Bainhira remata hasoru malu ho Prezidente Republika, Ativista Empoderamentu ba Feto, Maria Abrantes ba jornalista iha Palasiu Prezidensial Nicolau Lobato, Bairo Pite, Sesta (09/01/2026) hatete, ida nee preveleiju boot ida bele hasoru Prezidente, tanba Prezidente iha ajenda lubuk maibe bele hasoru mos feto sira.
“Ami nain rua iha setor neebe mak hanesan, durante nee mos ami servisu iha empoderamentu feto, entaun ami iha planu potensial ida neebe ami hakarak ratifika ba Prezidente atu hatene hela ami nia projetu neebe mak daudaun nee ami halao hela, ami presiza atu bele hetan kontribuisaun liu tan para bele realiza ida nee hadia liu tan,” dehan Maria Abrantes.
Nia hatete, sira nia planu inisiativa neebe halo mak sei realiza dapur Dili nia hodi fo konhese ba komunidade sira klean kona-ba produtu lokal sira no sei halo parseria ho agrikultura sira iha baze no uniku husi ida nee mak sei raning direita husi feto, no tarjetu ba iha feto sira neebe devorsiadu ou feto dona de kasa sira.
“Ami planu hela oinsa rekruta no kapasita nomos halo sira sai hanesan nain ba iha negosia sira nee, depois ida nee ami hakarak sira fila fali ba sira nia fatin, sira mos kontinua loke fila fali sira nia negosio kiik sira iha sira nia komunidade, tanba bazeia ba dadus neebe mak ami iha mak hanesan ita hotu hatene ida nee laos ona segredu boot ida ba publiku, iha porsentu aas tebes feto sira neebe dezempregu liu mane sira, no iha porsentu lubuk ida mos feto sira neebe mak iha deit uma laiha atividade laiha kursu no laiha eskola no laiha serbisu tanba nee mak ami nia tarjetu ba feto hirak nee,” dehan nia.
Nia hatutan, durante nee iha programa barak ba feto enjeral mais haluha tiha katak iha feto barak mos mai husi feto neebe devorsiada ou feto neebe moris mesak, no atividade sira nee hatoo ona ba Prezidente.
“Buat sira nee hatoo ona ba Prezidente no agradese tanba hetan ona rekomendasaun pozitivu ida neebe mak husi Prezidente no ita hein katak projetu ida nee sei bele implementa diak liu tan iha Dili nomos feto maluk sira neebe mak iha liur neeba,” katak nia.
Nia hatete, atividade nee halao husi Dili maibe la taka dalan ba feto sira neebe husi Munisipiu neebe sei hola parte iha rekrutamentu nia.
Nunee mos Ativista Empoderamentu ba Feto (Rosalia Trindade hatutan projetu nee tarjeitu fo oportunidade ba 30 pesoas maibe ida nee seidauk garante katak sira mai tuir treinamentu masimu.
“Nee hanesan tarjetu, ida neebe mak ami garante katak ida nee inisiativa nee sustantablidade tebes katak bainhira projetu nee lao ami sei jeneraliza ami nia finansial husi atividade neebe mak ami halo,” katak nia.
Nia hatete, sira foka iha Dili tanba besik liu, nunee sira bele halo observa direita karik feto sira hasoru difikuldade ruma mai tuir treinamentu entau sira fasil atu kontaktu sira.
Iha biban nee Prezidente Republika dirije kedas feto potensial nain rua hasoru diresaun ida neebe mak toma konta klean konaba empoderamentu ekonomia feto, no liga ho ida nee sira sei hasoru direita diresaun refere hodi hatoo dokumentus formal sira nunee Prezidente Republika sei haree saida mak Prezidente bele apoiu tuir proposta neebe iha.
(eme)
