DILI, STLTIMORLESTE.com – Nain ba Empreza Aero Dili, Lourenço de Oliveira deklara, Aero Dili hakarak hatutan konektividade ba nasaun rejional no Asia tomak iha futuru.
Kestaun nee nain ba Empreza Aero Dili deklara, wainhira simu aviaun Airbus daruak Aero Dili nian ho marka A319, iha Aeroportu Internasional Prezidente Nicolao Lobato.
Nain ba Empreza Aero Dili, Lourenço de Oliveira agradese ba konvidadus sira neebe ho laran luak bele hola parte iha Aeroportu Internasional Prezidente Nicolao Lobato hodi simu aviaun Airbus daruak Aero Dili nian, ho tipu A319 mai Timor Leste.
“Ho aviaun ida tan, espera katak neneik neneik Aero Dili bele hatutan konektividade entre Timor Leste ho nasaun rejional sira hotu no ba Asia tomak,” hatete nain ba Empreza Aero Dili, Lourenço de Oliveira liu husi nia diskursu iha ambitu simu aviaun Airbus A1319, iha Aerportu Internasional, Komoro, Dili.
Nia hatuatn, Empreza Aero Dili hakarak agradese ba Ministeriu Transporte no Komunikasaun ba apoiu tomak neebe durante nee fo mai Aero Dili, espesialmente ba tempu no matenek liu husi lideransa Presidente Autoridade Aviasaun Civil Timor Leste (AACTL) no nia vogais no funsionariu sira neebe ho esforsu tomak akompanha iha prosesu sira hotu atu aviaun daruak nee ohin loron bele too mai iha Timor Leste.
Nia dehan, Empreza Aero Dili iha esperansa boot nafatin ba Ministeriu Transporte no Komunikasaun atu bele sai nuudar mahon ba empreza Aero Dili hodi hamutuk dezenvolve industria aviasaun iha Timor Leste.
“Ho aviaun segundu ida nee, karik buat hotu lao ho diak, iha tinan nee nia laran Aero Dilli sei lansa tan voo ba Australia, no espera katak bele semo mos ba Bangkok, wainhira Air Service Agreement entre Timor Leste no Tailandia iha ona,” karak Lourenço.
Iha biban nee nain ba Empreza Aero Dili nee mos hatoo agradesimentu ba Banku Nasional Komersiu Timor Leste (BNCTL – sigla português) ba apoiu masimu neebe durante nee fo mai Aero Dili atu bele hamriik no hahu lao ba oin.
Tanba banku nuudar instrumentu xave neebe esensial tebes atu empreza ida bele moris, no ohin lokraik nee hau hakarak hatoo katak BNCTL sai nuudar fonte prinsipal ba Aero Dili atu bele sosa aviaun Airbus A319 ida nee.
“Tanba nee liu husi BNCTL hau hakarak hatoo obrigadu wain ba Governu, ba politika neebe apoia empreza hanesan Aero Dili atu hetan finansiamentu hodi alkansa ami nia planu negosiu sira hotu,” dehan nia.
Aleinde nee nain ba Empreza Aero Dili dala ida tan hatoo agradesimentu ba parseiru sira durante nee koopera hamutuk ho Aero Dili hodi fornese servisu neebe diak ba klientes hotu, hanesan Agencias de Viagem sira, Online Travel Agents, Rocella e Aroma, Fresca, ETO no STAT.
Iha fatin hanesan, Ministru Transporte Telekomunikasaun (MTK), Miguel Manetelo hateten, haksolok tebes bele mai hamutuk ho altas entidades sira hotu estadu nian no konvidadus sira hotu iha eventu simu aviaun foun Aero Dili nian.
Tuir nia, Timoran hotu orgulhu no apresia ba inisiativa Aero Dili hodi haluan nia kobertura, liu husi aumenta nia aviaun neebe sei apoia operasaun servisu aerea Timor Leste nian.
“Tanba iha fulan kotuk ita hotu sai ona sasin ba lansamentu primeiru Voo Aero Dili nian ba Xina (Xiamen), no ohin ita hotu iha nee atu fo sasin ba simu aviaun Airbus A1319,” hatete Miguel Manetelu.
Konektividade mak xave ba progresu dezenvolvimentu nasaun ida nian. Rede transporte neebe forte mak mobilidade ema no sasan no servisu sira bele muda ho efisiente liu tan no promove kresimentu ekonomiku.
Tanba iha Timor Leste, konektividade aero iha importansia ho partikularidade ida, tanba bele promove komersiu, suporta turizmu no hasae tan Timor Leste nia envolvimentu iha nivel Global.
“Tanba transporte aero sai nuudar servisu xave ida ba movimentu ema no sasan mai ita nia rain no husi ita nia rain ba rai liur, no sei tulun atu dudu dezenvolvimentu industria turistika, komersiu no negosius seluk, liu-liu atu hetan konfiansa ba ligasoens entre Timor Leste no destinos rejionais no internasionais,” tenik nia.
(alb)
