DILI, STLTIMORLESTE.com – Asosiasaun Espoza Polisia Nasionál Timor Leste (AESPNTL) hamutuk ho Polisia Nasionál Timor Leste selebra misa agradesimentu ba ezistensia tinan rua (2) ho tema “Hamutuk Reforsa Amizade no Familiaridade iha AESPNTL”.
Visi Prezidente AESPNTL, Ticha Altrudes Valente dehan, misa agradesimentu ba loron ezistensia AESPNTL ba dala II, prezide husi Am Selebrante Padre Roberto Cosat, SVD no akompaha husi Amu Co-Selebrante Padre Miguel Arcanjo inklui Amu Kapelaun PNTL Padre Abril Lopes, iha Kapela Santo António iha Sentru Formasaun Polisia Akademia Komoro (CFP).
“Hau hatoo agradesimentu ba prezensa husi Espoza no Marido sira iha Misa Agradesimentu ne’e no husu atu nafatin apoiu no suporta espoza no marido sira iha sira nia servisu loron-loron,” hatete Ticha ba jornalista sira iha CFP, Domingu nee (27/04/2025).
Nia esplika, AESPNTL sai ona hanesan Parseria Institusional PNTL nian, nunee AESPNTL sai hanesan fátor importante ida ba kada membru PNTL hodi halao servisu tuir Lei no ordem.
Iha fatin hanesan, Komandante Jerál PNTL Komisariu Jerál Polísia Henrique da Costa informa, ezistensia AESPNTL nian foin mak tama ba tinan rua (2), maibe husu atu ita hotu-hotu kuidadu asosiasaun nee hodi buras no forte, nunee bele lori benefisiu diak ida ba instituisaun PNTL.
“Atu haboot asosiasaun nee prezisa ita hotu nia apoiu no suporta liu husi kria atividade iha idak-idak nia Komando Munisipiu no Unidade atu bele iha amizade ba malu entre espoza no marido PNTL nian, tanba nee dala ida tan hau hatoo parabens ba AESPNTL ninia aniversariu tinan nee,” nia deklara.
Nia esplika, atividade hirak neebe atu realiza hodi Komemora Aniversariu AESPNTL nian iha tinan 2025 maibé hetan kanselamentu relasiona ho Lutu Nasional ba Falesimentu Sua Santidade Papa Francisco nian, mak atividade hirak hanesan Seminariu Nasional, Kompetisaun Poco-Poco no Asaun Karidade tuir planu sei realiza hikas iha fulan Maiu tinan 2025 nee.
Iha loron 6 fulan Maiu sei realiza Seminariu Nasional iha Sentru Konvensaun Dili, Kompetisaun Poco-Poco sei halao iha loron 14 fulan Maiu iha resintu Largo Lesidere, hafoin ida nee mak sei kontinua ho atividade Asaun Karidade.
Entretantu parte iha Misa Agradesimentu nee Komandante Jerál PNTL Komisariu Jerál Polísia Henrique da Costa, Segundu Komandante Jerál Komisariu Polísia Pedro Belo, Komandante Komando Supervizaun, Komandante Komando Munisipiu 13 inklui RAEOA, Komando Unidade (UPM, UEP, UFP), Prezidente AESPNTL Manuela de Araujo, Visi Presidente AESPNTL, Ticha Altrudes Valente Gonçalves ho estrutura, Koodenadora AESPNTL husi Komando Munisipiu 13 inklui RAEOA, UPM, UEP, UFP, Ofisias Superior, Ofisias Subalternu, Sarjentu no Ajente inklui familia membru PNTL nian.
(jen)
