BAUKAU, STLTIMORLESTE.com – Afaça oan ka komunidade husi Suku Afaça, Postu Administrativu Kelikai, tempu bailoron buka bee moos too iha mota Samaguia, Suku Tekinomata, Postu Laga, Munisipiu Baukau.
Deklarasaun nee hatoo husi Xefe Suku Afaça, Joaquim Fernandes Ximenes ba STL liu husi telefone, Kinta (17/10/2024).
“Iha ami nia suku tempu bailoron hanesan nee bee matan maran hotu, neebe ba kuru fali iha Kougira Samaguia,” nia dehan.
Autoridade Suku nee esplika, Suku Afaça iha bee matan rasik ho naran Boeira, maibe kada tinan tempu bailoron labele fornese ona ba komunidade sira, tanba maran.
Nunee tempu IV Governu Konstitusional fasilita ona kanaliza bee moos husi bee matan uasunana hodi substitui bee matan Boeira oferese ba komunidade sira iha tempu bailoron, maibe daudaun labele ona atu subtitui, tanba fasilidade hanesan manguera no profil aat.
Nia sublina, husi kondisaun hirak nee komunidade sira tenke hulan jeregen ho distansia kilometru 5 ba mota Samaguia no kilometru 3 ba Kougira hafoin kuru bee, enkuantu seluk neebe iha osan tenke sosa husi faan bee sira tanki 5000 litru ho folin US$ 70 hafoin utiliza ba nesesidade kada loron.
Habitante husi Aldeia Uligata, Lucia Ximenes akresenta, problema bee moos ba komunidade Afaça nee tinan naruk ona, mezmu bee matan iha maibe debitu kiik neebe la auguenta fahe ba komunidade sira, too tempu tenke maran.
(EST 2)
