DILI, STLTIMORLESTE.com – Relasiona ho publiku no majistradu rai liur balu kestiona kona-ba nomeasaun Prezidente Tribunal Rekursu (PTR), mak PTR Afonso Carmona konsidera katak, nasaun iha nia regra rasik.
Nia dehan, TL iha nia regra rasik, no Prezidente Republika (PR) nomeia tuir poder neebe iha.
“Nasaun iha nia regra rasik, Prezidente Republika maka nomeia iha Konstituisaun artigu 86 alinha J hateten Prezidente nomeia la dehan tuir lei haruka, Prezidente Republika halo tuir nia poder,” dehan PTR, Afonso ba jornalista sira, iha Kaikoli, Dili, Segunda (01/12/2025).
Afonso dehan, Timor Leste nasaun soberanu lalika preokupa ho Timor Leste nia situasaun, kuandu koalia kona-ba Timor tenke hatene istoria husi 2000 too 2025 nee.
“Ita nia regulamentu nee komplikadu uitoan, mai husi regulamentu UNTAET, lei Indonezia tuir lei numeru 3/2010 dehan, no artigu balu iha Konstituisuan RDTL dehan, TR ejistente too Instalasaun Supremu Tribunal Justisa,” dehan nia.
Iha fatin ketak, Akademiku UNTL Sebastiao dos Santos dehan, se deit maka la aseita ho nomeasaun, iha dalan rekore ba iha Tribunal neebe aas liu.
“Hau hanoin la aseit ka la konkorda ona, bele liu husi dalan legal neebe iha, hodi ba hato iha Tribunal neebe aas liu,” dehan nia.
Nia hatutan, hetan ona nomeasaun importante maka halao servisu ho professional tuir lei haruka, hodi dezenvolve liu tan sistema justisa lao ba oin.
Hanesan Timor oan halao knaar ho loos, tanba ohin loron ema barak maka sei halerik ba sistema justisa neebe iha, sai hanesan PTR buka solusaun ba problema sira iha setor justisa.
Jornalista: Terezinha De Deus
Editora: Carme Ximenes
