DILI, STLTIMORLESTE.com – Prezidente Tribunal Rekursu, Afonso Carmona hatete, pedidu fiskalizasaun abstrata ba revogasaun lei Pensaun Vitalisia iha ona Juiz nia liman.
“Primeiru hau koalia dehan hau la koalia, segundu hau koalia dehan prosesu nee iha Juiz nia liman ona, sira sei halo sitasaun ba parte neebe fo resposta buat nee lao hela,” dehan PTR, Afonso ba jornalista sira iha Kaikoli, Kinta (18/12/2025).
Nia hatutan, kestaun prosesual importante nia andamentu lao, tanba atu avalia Juiz nee laos nia desizaun konstituisional ka inkonstituisional maibe nia andamentu tuir regra ka lae.
“regra prosesual se la halo buat sira nee bele nulu fali, nulu signifika la vale total, se Juiz la halo ida nee Juiz saida maka nee, sa tan Juiz iha Tribunal Rekursu, Tanba nee prosesu hotu lao tuir prazu neebe termina,” dehan nia.
Hatan kona-ba Estudante sira hatama karta, PTR dehan, se sira hatama karta mos Tribunal labele fo resposta viola fali lei, maibe se Konselhu Superior Majistradu Judisial autoriza maka foin bele koalia.
Konselhu nee kompostu husi ema nain lima, Prezidente Tribunal Rekursu maka nuudar Prezidente Konselhu, iha reprezentante Governu, Prezidente, Parlamentu no Tribunal nian, sira autoriza maka foin koalia.
Iha fatin ketak, Jurista Sergio Dias Quintas dehan, Tribunal Rekursu (TR) halo hela fiskalizasaun abastrata kona-ba lei Pensaun Vitalisia neebe hatama husi eis titular sira, tanba nee Jurista husu TR tenke hatene antes foti desizaun.
“Poder judisial ka TR mos tenki hatene antes foti desizaun, tanba ita hotu hatene katak lei referida hetan revizaun iha Parlamentu Nasional (PN), tanba efeitu husi manisfestaun neebe afeta ba situasaun pais nian, tanba nee maka iha mudansa, TR nia desizaun labele hamosu fali problema foun iha pais ida nee,” dehan Jurista Sergio.
Nia hatutan, iha pais neebe deit normalmente Tribunal nia desizaun atu rezolve problema, maibe laos atu hamosu fali problema foun.
Aleinde nee, Jurista Jose Maria Guterres dehan, kuandu husu fiskalizasaun abastrata ba iha TR, maka TR sei hare hodi diside.
“Se husu TR halo fiskalizasaun abastrata, sira sei hare depois foti desizaun konaba ida nee,” dehan nia.
Jornalista: Terezinha De Deus
Editora: Carme Ximenes
