DILI, STLTIMORLESTE.com – Eis Deputadu husi Bankada Partidu Sosial Demokrata (PSD) iha Primeiru Lejislatura, Leandro Isaac konsideira Prezidente Republika (PR), Jose Ramos Horta nomeia ho pose eis Juiz Administrador Tribunal Distrital Dili, Afonso Carmona nuudar ka sai Prezidente Tribunal Rekursu (PTR) kontra Konstituisaun RDTL no Lei Organika Juizes sira nian, tanba hasae tempu servisu husi tinan 16 ba tinan 20.
Nia dehan, nomeasaun nee laos kontra deit lei maibe falsifika dokumentu hodi hasae tempu servisu husi tinan 16 ba tinan 20. “Ita haree ida nee viola Lei Organika Juizes sira nian kona-ba kategoria primeira klase hodi ba too ida ikus, nunee hodi bele hetan direitu ba promosaun kareira,” dehan Leandro Isaac ba STL liu husi messenger Segunda, (26/05/2025).
Tanba tuir Eis Deputadu nee katak, ida nee normas universal ba kualker instituisaun Estadu ka organizasaun laos ho gostu interese politika familiarizmu, rasa, relijiaun no politika. Nunee partidu politika iha Parlamentu Nasional, Organizasaun Jurista Nasional neebe iha interese kona-ba justisa ho nia sitema ka rejime tenke hola asaun ruma, hodi trava hahalok kontra Estadu de Direitu Demokratika neebe sai nuudar prinsipiu fundamental ba RDTL.
No nia deskonfia Prezidente Republika (PR) no Primeiru Ministru, Kay Rala Xanana Gusmão oho sistema hirarkia iha rejime judisiariu Timor Leste (TL) no viola K-RDTL, ho interese politika hodi proteje malu liu husi konspirasaun ho korruptor sira. “Faktus provadu mak ita hotu haree no rona iha rezultadu auditoria Kamara de Kontas husi Tribunal,” hatete Eis Deputadu nee.
Antes nee Deputadu Bankada CNRT, Gabriel Soares hatete, Prezidente Tribunal Rekursu empossadu tuir artigu 127 Konstituisaun RDTL no artigu 81 pontu 4, Estatutu dos Magistrados dos Judiciais, Lei no 5/2022 de 30 de Marco, kata Prezidente Tribunal Rekursu mai husi Juiz karreira, Majistradu iha Ministeriu Publiku, Defensoria Publiku ka Jurista ho meritu rekonhesidu, neebe sidadun nasional no rekonheseantiguidade ih kategoria inklui segunda alterasaun a Lei no 25/2021, de 2 de Dezembro, Lei da Organizasaun Judisiaria neebe fo kompetensia propriu ba Prezidente Republika hodi nomeia Prezidente Tribunal Rekursu (PTR).
Haree ba kestaun nee, Prezidente Tribunal Rekursu Afonso Carmona prienxe ona rekizitus legais konstitusionais, hanesan Timoroan, ezerse funsaun nuudar Juiz karreira liu tinan 20 rekonhesidu de 2” classe iha Tribunal Judicial de Primeira Instancia de Dili. Pratika nee mos akontese iha tinan 2013, bainhira Prezidente Republika, Taur Matan Ruak nomeia Juiz de 2ª classe Dr. Guilhermino da Silva nuudar jurista Timoroan ida, neebe okupa kargu nuudar Prezidente Tribunal Rekursu Timor Leste nia.
(car)
