BAUKAU, STLTIMORLESTE.com – Kombatente João Buka Tuir agradese ba Prezidente Republika (PR), José Ramos Horta neebe informa ba publiku, buka tuir ona saudozu Nicolau Lobato nia ruin iha Indonezia, maibe husu keta haluhan mos David Alex Daitula neebe lakon iha tempu Indonezia too ohin loron la hatene nia paradeiru.
“Hau hanoin bainhira ita nia Prezidente Republika iha pensamentu atu buka tuir saudozu Nicolau Lobato nia ruin, hau orgulho no agradese tanba 24 ona mais seidauk iha hanoin atu buka tuir, maibe hau rekomenda hela se bele karik bele esforsu mos ba maun David Alex Daitula nia paradeiru,” hateten João Buka Tuir ba jornalista STL iha Vila Antiga, Baukau, Tersa (19/08/2025).
Nia konsidera, politika Prezidente Republika, José Ramos Horta ba asuntu buka tuir saudozu Nicolau Lobato iha Indonezia nee diak, tanba bainhira hetan no lori hikas mai Timor Leste bele haloot ho dignu, nunee hanesan kombatente reza ba esforsu sira neebe PR halo no rekomenda buka tuir mos David Alex Daitula neebe mos lakon.
Tuir kombatente João Buka katak, saudozu Nicolau Lobato nuudar Prezidente iha tempu 1975 aleinde mos lidera partidu Fretilin iha tempu neeba too lakon paradeiru no hamosu situasaun tristeza ba Povu Maubere. Enkuantu Komadante David Alex Daitula nuudar hun mos ba luta libertasaun nasional neebe lakon iha area Baukau Vila tinan 1997 too agora laiha paradeiru.
“Se Prezidente Republika la temi David Alex nia naran ami triste, tanba husi nia kuida rezistensia nee luta too hetan objetivu, tanba nee triste desde nia lakon laiha ema ida koalia, maibe agora ita nia Prezidente Republika hakarak atu buka tuir maun Nicolao Lobato, tanba nee ami husu nain Prezidente hanoin mos nia alin David Alex,” katak João.
(tom)
