DILI, STLTIMORLESTE.com – Ministeriu Publiku (MP) ameasa arguidu RPBM pena suspensaun tinan 3.
Tuir akuzasaun neebe Juiz Singular Jose Quintao lee sai iha loron Sesta (24/01/2025) katak, iha dia 26 Junhu 2023, haleu oras tuku 24:00 OTL, iha Aldeia Soru Motu Ba Dame, Dili, arguidu RPBM lori liman tuku ho makaas dala ida kona iha ofendida nia kotuk laran, no lori liman basa ho makaas dala ida kona iha ofendida nia hasan sorin karuk.
Konsekuensia direita husi agresaun fizika nee, ofendida hetan moras makaas iha kotuk laran, moras makaas iha hasan sorin karuk, bubu no mean. Ofendida la ba halo tratamentu iha hospital.
Kauza husi agresaun fizika nee, tanba ofendida ba tuir festa iha Taibesi, nunee ofendida fila mai uma arguidu halo kedas agresaun fizika hasoru ofendida.
Arguidu RPBM halo ho forma livre, deliberada no konsientemente, hatene katak lori liman tuku ho makaas dala ida kona iha ofendida nia kotuk laran no lori liman basa ho makaas dala ida kona iha ofendida nia hasan sorin karuk, nuudar meiu neebe aktu hodi hamosu ofensas ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Tanba nee MP konstitui arguidu RPBM nudar autor material ho forma konsumadu ba pratika krimi ofensa ba integridade fizika simples ho forma violensia domestika 1 (ida), previstu no punidu tuir artigu 1450 husi Kodigu Penal konjuga ho Lei Kontra Violensia Domestika numeru 07/2010, loron 07 fulan Julhu.
Hatan ba akuzasaun neebe iha, arguidu konfesa katak, momentu neeba ofendida ba festa no fila tarde labarik tanis makaas, ho nunee mak arguidu basa lezada dala ida kona iha lezada nia hasan sorin karuk, no tuku dala ida kona iha lezada nia kotuk laran.
Arguidu deklara, akontese tiha problema liu tiha loron rua mak familia sira tur hamutuk hodi rezolve, arguidu mos husu deskulpa ba lezada, hahu husi neeba kedas mai too agora la iha tan problema ona.
Arguidu arepende ho nia hahalok nee no promete iha futuru arguidu sei la halo tan agresaun fizika hasoru lezada.
Entretantu ofendida IMJB mos deklara, momentu neeba ofendida ba festa no fila tarde labarik tanis makaas, ho nunee mak halo arguidu nervozu hodi halo agresaun.
Banhira rona tiha deklarasaun husi parte rua, tribunal husu Ministeriu Publiku atu submente kedas ba alegasaun. Iha alegasaun Prokurador Napoliao da Silva husu ba Tribunal atu kondena arguidu ho pena prizaun tinan 1 suspende ba tinan 3.
Parte defeza Jose Guterres husu ba Tribunal atu fo pena multa ba arguidu.
Audensia julgamentu nee prezide husi Juiz Singular Jose Quintao, Ministeriu Publiku reprezenta husi Prokurador Napoleao da Silva, arguidu hetan asistensia legal husi Defensoria Publika Jose Guterres.
(ter)
