BAUKAU, STLTIMORLESTE.com – Komunidade agrikultores sira iha Postu Administrativu Baguia, Munisipiu Baukau, presiza fini no apoiu tekniku agrikultura modernu husi extensionista sira.
Administrador Postu Administrativu Baguia, Mario Xavier da Silva esplika, ba epoka 2025 agrikultores Baguia liu husi Autoridade Postu hetan apoiu fini hare tonelada 1 husi Ministeriu Agrikultura Pekuaria Peska no Florestal neebe atu apoiu ba komunidade agrikultores sira hodi prosesa viveiru no kuda iha natar laran neebe bele aumenta produsaun hatan ba nesesidade.
“Ba tinan ida nee ita simu fini tonelada ida, hau sente fini hirak nee labele kobre, tanba ita iha potensialidade, maibe fini mai ho limitasaun,” informa Mario ba STL iha Vila Nova, Baukau, Tersa (18/03/2025).
Fini hare tonelada ida neebe MAPPF apoiu ba Postu Baguia, tuir planu sei kobre deit ba natar hektare 67 neebe kada hektare sei hetan kilograma depende ba medida natar.
Nunee Autoridade Postu hahu distribui ona ba agrikultores sira iha Suku Samalari inklui Lavateri, enkuantu fini balu sei asegura iha edifisiu Postu Baguia, neebe tuir planu sei kontinua distribui ba Suku Uakala, Larisula no seluk tan neebe seidauk hetan.
Kona-ba preparasaun, komunidade agrikultores sira iha Baguia hanesan iha Suku Larisula hahu hamoos bee dalan hodi kanaliza bee ba natar hamutuk hektare 300 liu neebe sei funsiona, enkuantu iha suku seluk komunidade agrikultores hahu ona taka kabubu.
“Ita menus rekursus umanu iha neeba, tanba daudaun iha extensionista nain rua (2) deit, entaun ita prezisa asistensia tekniku sira husi extensionista para fo asistensia tenkniku ba ita nia agrikultores sira,” Mario mrelata.
Mezmu preparasaun komunidade agrikultores nian iha Baguai hahu ona atu ativa natar sira, maibe parte seluk sei falta konhesimentu tekniku ba agrikultura modernu.
Nunee presiza apoiu husi pesoal extensionista neebe destaka iha Postu Baguia nia tulun atu fasilita komunidade agrikultor adapta ba sistema agrikultura moderdu hodi hasae numeru produsaun, maibe pesoal extensionista la sufisiente hodi kobre suku 10 iha Baguia fo asistensia tekniku ba agrikultores sira.
Tanba nee, Autoridade Postu husu parte kompetente atu aumenta pesoal extensionista iha Baguia, nunee bele reforsa sistema agrikultura moderdu ba agrikultores sira.
Aleinde nee mos Mario informa, fasilidade agrikultura hanesan hand-traktor neebe Ministeriu Agrikultura Pekuaria Peska no Florestal liu husi Autoridade Munisipal apoiu ba Postu Baguia hamutuk unidade 3 atu apoiu fila rai ba komunidade no grupu agrikultores sira.
“Koalia kona-ba ekipamentus seidauk sufisiente, no traktor hirak nee la merese ita lori ba Larisula, tanba kondisaun rai iha neeba la hanesan iha Buakau,” deklara Mario.
Mekanizmu apoiu Hand-Traktor, parte suku prezisa aprezenta pedidu hafoin postu desloka Hand-Traktor, hatan pedidu fila rai neebe provizoriu postu simu ona mak pedidu husi Suku Hae-Koni, nunee tempu besik Autoridade Postu sei koloka Hand-Traktor ba Suku refere hodi halai natar.
Maibe Hand-Traktor refere labele utiliza ba halai natar iha Suku Larisula, tanba kapasidade Hand-Traktor labele responde natar iha Larisula, tanba toos no la mamar hanesan iha natar sira iha suku seluk.
Enkuantu ligadu menus pesoal extensionista no fini hare ba iha Postu Administrativu Baguia, STL tenta konfirma Diretor Servisu Agrikultura Munisipiu Baukau iha Sentru Konvensoens Vila Antiga, maibe lakohi fo komentariu.
(tom)
